مەسرور بارزانی: هەرێمی کوردستان هەرگیز مایەی هەڕەشە نەبووە بۆ هیچ لایەک

K24 - هەولێر

سەرۆکوەزیران مەسرور بارزانی دەڵێت، "هەرێمی کوردستان هەرگیز مایەی هەڕەشە و مەترسیی نەبووە بۆ هیچ لایەک، بەڵکوو هەمیشە فاکتەری ئاسایش و ئارامیی بووە لە عێراق و ناوچەکە".

مەسرور بارزانی، سەرۆکی حکومەتی هەرێمی کوردستان لە گوتارێدا، لە سێیەمین کۆنفرانسی نوێنەرایەتییەکانی حکومەتی هەرێمی کوردستان؛ رەتیکردەوە هەرێمی کوردستان هەرگیز مایەی هەڕەشە و مەترسیی بووبێت بۆ سەر هیچ لایەک و، گوتی، "هەمیشە دەستی دۆستایەتیمان بۆ هەموو وڵاتانی ناوچەکە و کۆمەڵگەی نێودەوڵەتی بەگشتی درێژ کردووە".

سەرۆکوەزیران مەسرور بارزانی بە پێویستیشی دەزانێت، "بەرژەوەندییە هاوبەشەكانمان لەگەڵ وڵاتانی ناوچەکە و وڵاتانی جیهان لەبەرچاو بگیرێت و بپارێزرێ‌ و پێویستە سەروەری هەرێمی کوردستان و عێراق، ڕێزی لێ بگیرێت و پێشێل نەکرێت".

بە گوتەی سەرۆکوەزیران، هەرێمی کوردستان "خوازیاری باشترین پەیوەندییە لەگەڵ وڵاتانی دراوسێ و کۆمەڵگەی نێودەوڵەتی بە گشتی. ئامانجمان پەرەپێدان و بەهێزکردنی پەیوەندییە دەرەکی و نێودەوڵەتییەکانمانە لەسەر بنەمای بەرژەوەندی هاوبەش و ڕێز لەیەکترگرتن".

حکومەتی هەرێمی کوردستان، وەکو ئەوەی مەسرور بارزانی گوتی، "سەلماندوویەتی هاوبەشێکی گرنگ و کارای کۆمەڵگەی نێودەوڵەتییە و لە چەندین بواردا، جێی بایەخی وڵاتانی جیهانە، بە تایبەتی کە هەرێمەکەمان ناوچەیەکی سەقامگیر و مەڵبەندی بەیەکەوەژیانی ئاشتییانەی پێکهاتە جیاوازەکانە".

مەسرور بارزانی گوتی، "حکومەتی هەرێمی كوردستان، لە ماوەی ڕابردوودا، ڕووبەڕووی چەندین قەیرانی سیاسیی و ئەمنی و ئابووری و دارایی بووەتەوە و ناحەزان هەوڵیانداوە بە هەموو شێوەیەک، کێشە و ئاستەنگ بۆ پێشکەوتنی و ئاوەدانیی و سەقامگیریی کوردستان دروست بکەن، بەڵام بە پشتیوانیی خوای گەورە و خۆڕاگری خەڵکی کوردستان و پێشمەرگە قارەمانەکانمان، بەسەر هەموو کۆسپ و ئاستەنگەکان زاڵ دەبین، چونکە ئیرادەی میللەتەکەمان لە هەموو پیلانێک بەهێزترە. بۆیە لە ژێر هیچ گوشارێکدا، دەستبەرداری مافەکانمان نابین" .

بەیانیی ئــەمــڕۆ یەکــشــەممە، 28-01-2024، کاتــژمێر 10:00، بـە ئامادەبوونی مەسرور بـارزانی، سەرۆکی حکـومەتی هەرێمی کوردستان، لـە هـەولێری پایتەخـت، سێیەمین کـۆنفرانسـی نوێنەرایەتییەکانی حکومەتی هەرێمی کوردستان دەستیپێکرد.