کۆبوونەوەی پارتی و یەکێتی لە سلێمانی دەستیپێکرد
K24 - هەولێر
کۆبوونەوەی هەردوو مەکتەبی سیاسیی پارتی و یەکێتی لە شاری سلێمانی دەستیپێکرد. لە کۆبوونەوەکەدا چەند پرسێکی نێوخۆیی تاوتوێ دەکرێن.
کاتژمێر 11:00ـی پێشنیوەڕۆی ئەمڕۆ یەکشەممە، 04-02-2024، کۆبوونەوەی هەردوو مەکتەبی سیاسیی پارتیی دیموکراتی کوردستان و یەکێتیی نیشتمانیی کوردستان، لە دەباشان، لە شاری سلێمانی دەستیپێکرد.
ئەمە یەکەمین کۆبوونەوەی نێوان هەردوو مەکتەبی سیاسیی پارتی و یەکێتییە لە ساڵی 2024 و دوای ئەنجامدانی هەڵبژاردنی ئەنجوومەنی پارێزگاکانی عێراق. فازڵ میرانی، بەرپرسی دەستەی کارگێڕی مەکتەبی سیاسی پارتی سەرۆکایەتیی شاندی حزبەکەی دەکات و، بافڵ تاڵەبانیش، سەرۆکی یەکێتی، سەرۆکایەتیی شاندی ئەو حزبە دەکات.
لەتیف نێروەیی، ئەندامی سەرکردایەتیی یەکێتیی نیشتمانیی کوردستان بە کوردستان24ـی راگەیاند، تەوەرەکانی کۆبوونەوەی ئەمڕۆی نێوان هەردوو مەکتەبی سیاسیی پارتی و یەکێتی؛ پێکهێنانی حکومەتە خۆجێیەکانی پارێزگاکان بەتایبەت لە کەرکووک و نەینەوا، هەڵبژاردنی پەرلەمانی کوردستان و دۆخی ئێستای رۆژهەڵاتی ناوەڕاست و هەرێمی کوردستان دەبێت.
وەکو ئەوەی لەتیف نێروەیی باسی کرد، "دوای تەواوبوونی هەڵبژاردنی ئەنجوومەنی پارێزگاکانی عێراق، ئەنجوومەنی سەرکردایەتیی یەکێتی بڕیاریدا سەرەتا لەگەڵ پارتی کۆببێتەوە و لەبارەی پێکهێنانی حکومەتە خۆجێیەکان، بە تایبەت لە کەرکووک و نەینەوا لەگەڵ ئەو حزبە رێکبکەوێت، ئینجا دواتر لەگەڵ لایەنە سیاسییەکانی دیکە دەست بە گفتوگۆ بکات."