نازم هه‌ركی: جێبه‌جێنه‌كردنی رێككه‌وتننامه‌ی شنگال هۆكاره بۆ نه‌گه‌ڕانه‌وه‌ی خه‌ڵكی شارۆچكه‌كه
K24 - هەولێر:
به‌رپرسی لقی 17ـی پارتی دیموكراتی كوردستان ئاماژه به‌وه ده‌كات، جێبه‌جێنه‌كردنی رێككه‌وتننامه‌ی شنگال هۆكاره بۆ نه‌گه‌ڕانه‌وه‌ی خه‌ڵكی شارۆچكه‌كه. ده‌شڵێت، كۆمه‌ڵیك هۆكار و لایه‌ن هه‌یه رێگرن له جێبه‌جێكردنی رێككه‌وتننامه‌ی شنگال.
ئه‌مڕۆ (هه‌ینی 16ـی شوباتی 2024) نازم هه‌ركی، به‌رپرسی لقی 17ـی پارتی دیموكراتی كوردستان تایبه‌ت به كوردستان24 رایگه‌یاند، جێبه‌جێنه‌كردنی رێككه‌وتننامه‌ی شنگال هۆكاره بۆ نه‌گه‌ڕانه‌وه‌ی خه‌ڵكی شارۆچكه‌كه بۆ سه‌ر ماڵ و زێدی خۆیان، له كاتێكدا خه‌ڵكه‌كه خوازیارن بگه‌ڕێنه‌وه.
به‌رپرسی لقی 17ـی پارتی دیموكراتی كوردستان ئاماژه‌ی به‌وه‌ش كرد، پارتی خاوه‌نی بنكه‌یه‌كی گه‌وره و فراوانی جه‌ماوه‌رییه له شنگال، بۆیه شنگالییه‌كان چ له كامپه‌كاندا بن یان بگه‌ڕێنه‌وه، ئه‌وان پارتی دیموكراتی كوردستان به خاوه‌نی خۆیان ده‌زانن، ئه‌نجامی هه‌ڵبژاردانه‌كانیش له‌و باره‌یه‌وه به‌ڵگه‌یه.
نازم هه‌ركی باسی له‌وه‌ش كرد، كۆمه‌ڵیك هۆكار و لایه‌ن هه‌یه رێگرن له جێبه‌جێكردنی رێككه‌وتننامه‌ی شنگال، یه‌كێك له هۆكاره‌كانیش ئه‌و گرووپه چه‌كدارانه‌ی ناو شنگالن كه ناچنه ده‌ره‌وه. ته‌نانه‌ت له‌ناو حكومه‌تی عێراقیشدا كه‌سانێك هه‌یه به هه‌مان شێوه رێگرن له جێبه‌جێكردنی رێككه‌وتننامه‌كه.
رۆژی 9ـی تشرینی یەکەمی 2020، بەچاودێری مستەفا کازمی، سەرۆکوەزیرانی پێشووی عێراق و مەسرور بارزانی، سەرۆکی حکومەتی هەرێمی کوردستان، رێککەوتننامەی شنگال لە بەغدا واژووکرا، کە لە چەند خاڵێکی تایبەت بە ئاساییکردنەوەی دۆخی ئیداری، ئەمنی و ئاوەدانکردنەوەی ناوچەکە پێکهاتووە.
رێککەوتنەکە دوای پێنج ساڵ لە ئازادکردنی شنگال هات، دوای ئەوەی هێزەکانی پێشمەرگەی کوردستان بە سەرپەرشتیی سەرۆک بارزانی لە رۆژی 13ـی تشرینی دووەمی 2015، شارەکەیان لە دەست تیرۆریستانی داعش ئازادکرد.
رێککەوتننامەی شنگال کە ئامانج لێی ئاساییکردنەوەی دۆخی شنگال و ناوچەکە، گەڕانەوەی ئارامی و سەقامگیرییە و قەرەبووکردنەوەی ئاوارەکانە؛ بەسەر چوار تەوەردا دابەشکراوە، کە بریتین لە کارگێری، ئەمنی، ئاوەدانکردنەوە و بەدواداچوون بۆ جێبەجێکردنی ناوەڕۆکی رێککەوتنەکە.