22 لایەنی سیاسی بەشداری لە هەڵبژاردنی پەرلەمانی کوردستان دەکەن

kurdistan24.net

K24 - هەولێر:

یەک رۆژ لەبەردەم لایەنە سیاسیەکان و ھاوپەیمانی و کاندیدانی سەربەخۆ و کاندیدانی پێکھاتەکان ماوە بۆ ئەوه‌ی داواکاری پێشکەش بە کۆمیسیۆنی باڵای سەربەخۆی هەڵبژاردنەکانی عێراق بکەن بۆ بەشداریکردنیان لە ھەڵبژاردنی پەرلەمانی کوردستان.

بەپێی زانیارییەکانی کوردستان24 تاوەکوو ئێستا 22 لایەنی سیاسی، دوو ھاوپەیمانێتی و زیاتر لە 72 کاندید بۆ کورسی گشتی و کۆتای پێکهاتەکان تۆمارکراون.

یەکێک لەو لایەنە سیاسییانەی بایکۆتی شکاند و لە کۆمیسیۆن خۆی تۆمار کردووە، بزووتنەوەی ئیسلامی لە کوردستانە و عەبدوڵڵا وەرتی، گوتەبێژی بزووتنەوەکە بە کوردستان24ـی ڕاگەیاند: تاوەکوو ئێستا ڕاوێژیان پێنەکراوە بۆ دیاریکردنی ڕۆژی بەڕێوەچوونی هەڵبژاردن.

عەبدوڵڵا وەرتی گوتیشی: لە بازنەکانی هەولێر، سلێمانی و هەڵەبجە خۆیان تۆمار کردووە و لیستی کاندیدانی خۆیان پێشکەش بە کۆمیسیۆنی هەڵبژاردنەکان کردووە.

لەلایەن خۆیەوە، مەڕوان محەممەد، بەرپرسی نووسینگەی ھەولێری کۆمیسیۆنی باڵای سەربەخۆی ھەڵبژاردنەکانی عێراق ڕایگەیاند: بەردەوامن لەسەر ئامادەکارییەکانی خۆیان بۆ سەرپەرشتیکردنی هەڵبژاردنی خولی شەشەمی پەرلەمانی کوردستان و چاوەڕوانی سەرۆکایەتی هەرێمی کوردستان دەکەن، وادەی هەڵبژاردنەکە دیاری بکات.