لە دهۆک 21 هەزار تۆن برنج بەرهەم دەهێنرێت

بەڕێوەبەری کشتوکاڵی دهۆک ڕایگەیاند، لە سنووری پارێزگای دهۆک بۆ ئەمساڵ 21 هەزار تۆن برنج بەرهەم دەهێنرێت.

ئەمڕۆ چوارشەممە، 10ـی تەمموزی 2024، ئەحمەد جەمیل، بەڕێوەبەری کشتوکاڵی دهۆک، بە کوردستان24ـی ڕاگەیاند، ئەمساڵ لە سنووری پاریزگای دهۆک 21 هەزار و 468 دۆنم زەوی داچێنراوە بە برنج .

ئەو بەڕێوەبەرە دەڵێت، "پێشبینی دەکەین بۆ ئەمساڵ 21 هەزار تۆن بەرهەمی برنجمان هەبێت، هەروەها برنج چەند جۆرێکیشی هەیە، وەک؛ تحالف و كه‌سنه‌دیته‌ و بۆندار و شه‌ش مانگی و پێنج مانگی و زۆر جۆری دیکە،‌ به‌پێی لێکۆڵینەوەیەکیش کە لە ئاکرێ کراوە، پێشبینی دەکرێت ھه‌ر دۆنمێك برنج به‌رھه‌می بگاتە 850 بۆ ھه‌زار و 200 كیلۆ، بۆیه‌ به‌رھه‌مێكی باش ده‌بێت" .

ئه‌و بەڕیوەبەرە دەشڵێت: "برنجی سنووری پارێزگای دهۆک خواستی زۆر له‌سه‌ره‌ و نرخیشی تا ئاستێک گرانە، چونكه‌ لە ناوخۆی کوردستان و عێراق خواستێکی زۆری لەسەرە و هەناردەش دەکرێت بۆ وڵاتانی ئەورووپا و ئەمەریکا لەلایەن دوو کۆمپانیاوە. ئەمەش ھه‌نگاوێكی باشه‌ بۆ ساغكردنه‌وه‌ی به‌رھه‌می برنج، جووتیارانیش زیاتر ھان ده‌دات بۆ ئه‌وه‌ی ڕوو له‌ چاندنی برنج بكه‌ن".

ئاماژەی بەوەش دا، "هەرێمی كوردستان خاكێكی بەپیتی هەیە بۆ هەموو بەرهەمە كشتوكاڵییەكان".

ئەحمەد جەمیل ڕاشیگەیاند، "حكوومەتی هەرێمی كوردستان چەند ساڵێکە بە چڕی كار لەسەر پەرەپێدانی بەرهەمی ناوخۆ دەكاتەوە و ئەو بەروبوومانەی لە پێداویستی كوردستان زیاترە، بازاڕی لە دەرەوە بۆ دروست كردوون".