پاسەوانی سنوور لە دهۆک: هەشت کەسمان دەستگیر کرد کە بە نایاسایی هەوڵی دەربازی سنووریان دەدا
K24 – هەولێر:
فەرماندەیی هێزەکانی پاسەوانی سنوور، دەستگیرکردنی هەشت کەسی ڕاگەیاند کە هەوڵی دەربازبوونیان لە ناوچە سنوورییەکانی پارێزگای دهۆک دەدا.
ڕۆژی 18ـی تەمموزی 2024، لە ڕاگەیەندراوێکدا، فەرماندەیی هێزەکانی پاسەوانی سنوور ئاشکرای کردووە: هێزەکانیان لە سنووری پارێزگای دهۆک، هەشت کەسیان دەستگیر کردووە کە هەوڵیانداوە بەشێوەیەکی نایاسایی دەربازی سنوور بن.
بەپێی ڕاگەیەندراوەکە، ئەو هەشت کەسەی دەستگیر کراون شەش کەسیان هاووڵاتی بیانین و دوو کەسی دیکەیان ڕەگەزنامەی عێراقییان هەیە.
فەرماندەیی هێزەکانی پاسەوانی سنوور ئاماژەی بەوەشکردووە: پەڕاوی لێکۆڵینەوە بۆ دەستگیرکراوەکان کراوەتەوە و ڕێککاری یاسایی پێویست بەرامبەریان گیراوەتەبەر.