ئێران داوایەك لە شاندی باڵی دەستڕۆیشتووی یەكێتی دەكات

K24 – ھەولێر

راوێژكاری رێبەری كۆماری ئیسلامی ئێران لە تاران لەگەڵ شاندی باڵی دەستڕۆیشتووی یەكێتی كۆبووەوە و داوای لێكردون كە یەكێتی ناو یەكێتی بپارێزن.

میدیاكانی یەكێتی بڵاویانكردەوە شاندی حزبەكەیان بە سەرۆكایەتی مەلابەختیار لە تاران لەگەڵ محسن رەزایی راوێژكاری عەلی خامنەیی رابەری كۆماری ئیسلامی كۆبووەتەوە و باسیان لە پەیوەندییەكانی نێوانیان و شەڕی داعش كردووە.

محسن رەزایی كە فەرماندەی پێشووی سوپای پاسدارانی ئێرانە، بە گوێرەی میدكانی یەكێتی داوای لە شاندەكەی باڵی دەستڕۆیشتووی یەكێتی كردووە: "پاراستنی  مێژووی رابردووی یەكێتیی، لەئەستۆی سەرجەم یەكێتییەكاندایە‌و لەبەرژەوەندی هەموو یەكێتییەكانیشدایە، بۆیە پێویستە یەكێتیی ناو یەكێتیی‌ و ئەو مێژووە گەشەی رابردوتان، كە سەرمایەیەكی گەورەیە، بپارێزن".

وەك راگەیاندنی فەرمی یەكێتی بڵاویان كردوەتەوە لە دیدارەكەدا مەلا بەختیار باسی لە پەیوەندییەكانی نێوان ھەرێمی كوردستان و ئێران، ھەروەھا ستراتیجیەتی شەڕی داعش كردووە.

دوێنێ شاندێكی باڵی دەستڕۆیشتووی یەكێتی بە سەرۆكایەتی مەلا بەختیار و ئەندامیەتی عومەر فەتاح، پاڤڵ تاڵەبانی، سەعدی پیرە، خەسرەوگوڵ محەمەد، یاسین سابیر، سەردانی كۆماری ئیسلامی ئێرانیان كرد، بە گوێرەی زانیارییەكانی كوردستان24، تەوەری سەرەكی گفتوگۆی نێوان شاندی یەكێتی و بەرپرسانی ئێران چارەسەركردنی كێشەناوخۆییەكانی یەكێتی دەبێت.