ژماره‌ی قوربانیانی ئاگركه‌وتنه‌وه‌ی تاوه‌ره‌كه‌ی له‌نده‌ن به‌رزده‌بێته‌وه‌

K24 - هه‌ولێر:

پۆلیسی بریتانی رایگه‌یاند:" ژماره‌ی ئه‌و كه‌سانه‌ی به‌هۆی ئاگركه‌وتنه‌وه‌كه‌ی تاوه‌رێكی نیشته‌جێبوونی شاری له‌نده‌نه‌وه (Grenfell Tower)‌ گیانیان له‌ ده‌ستداوه‌، زیادی كردووه‌و ئه‌گه‌ری به‌رزبوونه‌وه‌ی زیاتریشی هه‌یه‌.

به‌ گوێره‌ی زانیارییه‌كانی پۆلیسی شاری له‌نده‌ن، تا ئێستا 6 كه‌س گیانیان له‌ ده‌ستداوه‌و نزیكه‌ی 50 كه‌سی دیكه‌ش بریندار بوون.

هه‌ر ئه‌مڕۆ ده‌سته‌ی فریاگوزاری ئه‌مبۆڵانسه‌كانی شاری له‌نده‌ن رایگه‌یاند" زیاتر له‌ 50 كه‌س به‌هۆی ئاگركه‌وتنه‌وه‌ له‌و تاوه‌ره‌ 24 نهۆمییه‌ی ناوه‌ڕاستی شاری له‌نده‌ن بریندار بوون و گواستراونه‌ته‌وه‌ بۆ نه‌خۆشخانه‌كان".

ستیوارت كریشتۆن، جێگری به‌ڕێوه‌به‌ری ئۆپه‌راسیۆنی ده‌سته‌ی فریاگوزاری ئه‌مبۆڵانسه‌كانی له‌نده‌ن گوتوویه‌تی" به‌هۆی ئاگره‌كه‌ی " Grenfell Tower " زیاتر له‌ 50 برینداریان به‌سه‌ر نه‌خۆشخانه‌كانی شاری له‌نده‌ن دابه‌شكردووه".