عێراق و سعووديه‌ ئه‌نجوومه‌نێكى هه‌ماهه‌نگى هاوبه‌ش داده‌مه‌زرێنن

K24 - هه‌ولێر:

سه‌ردانه‌كه‌ى سه‌رۆك وزيرانى عێراق حه‌يده‌ر عه‌بادى بۆ عه‌ره‌بستانى سعووديه‌ دامه‌زراندنى ئه‌نجوومه‌نێكى هه‌ماهه‌نگى هاوبه‌شى نێوان هه‌ردوو وڵاتى لێكه‌وته‌وه‌.

له‌ به‌ياننامه‌يه‌كى هاوبه‌شدا، ئه‌مڕۆ سێشه‌ممه‌ هه‌ريه‌ك له‌ به‌غدا و رياز، سووربوونى خۆيان له‌سه‌ر به‌رده‌وامى هه‌وڵه‌كانيان بۆ به‌ره‌نگاربوونه‌وه‌ى تيرۆر راگه‌ياند و جه‌ختيان له‌سه‌ر ئه‌وه‌ كرده‌وه‌، به‌يه‌كه‌وه‌ كار بۆ وشككردنى سه‌رچاوه‌كانى تيرۆر و پاره‌داركردنى رێكخراوه‌ تيرۆريستييه‌كان بكه‌ن.

عه‌بادى له‌ دواين رۆژى سه‌ردانه‌كه‌ى بۆ عه‌ره‌بستان له‌گه‌ڵ پادشاى ئه‌و وڵاته‌ سه‌لمان بن عه‌بدولعه‌زيز كۆبوويه‌وه‌ و له‌گه‌ڵ جێنشينى جێگره‌وه‌ى ده‌سه‌ڵات له‌ عه‌ره‌بستان ديدارى ئه‌نجامدا.