ماڕادۆنا ناوی ئه‌و سه‌رۆكوڵاته‌ی ئاشكرا كرد كه‌ پێی سه‌رسامه‌

مارادۆنا ئه‌فسانه‌ی پێشووی هه‌ڵبژارده‌ی ئارجێنتینا له‌ دیمانه‌یه‌كدا ناوی ئه‌و سه‌رۆكوڵاته‌ ئاشكرا ده‌كات كه‌ پێی سه‌رسامه‌ و ده‌شڵێت: ئه‌و سه‌رۆكه‌ داوای هاوكاری لێكردووم.

ئه‌مڕۆ سێشه‌ممه‌، 27 حوزه‌یرانی 2017، دیێگۆ ئه‌رماندۆ ماڕادۆنا له‌ دیمانه‌یه‌كدا كه‌ له‌ پێگه‌ی Oleـی ئارجێنتینا بڵاو بۆته‌وه‌، ده‌ڵێت: زۆر به‌ ڤلادیمێر پوتینی سه‌رۆكوڵاتی رووسیا سه‌رسامم.

مارادۆنا ده‌شڵێت: دوو مانگ پێش ئێستا په‌یوه‌ندی پێوه‌كردم و داوای هاوكاری و پشتگیری لێكردووم له‌ سه‌ركه‌وتنی به‌ڕێوه‌چوونی مۆندیالی 2018ـی رووسیا.

ماڕادۆنا گوتیشی: تا ئێستا له‌ نزیكه‌وه‌ به‌یه‌كه‌وه‌ دانه‌نیشتووین، به‌ڵام له‌ ماوه‌یه‌كی نزیك به‌یه‌كه‌وه‌ كۆده‌بینه‌وه‌ و گفتووگۆ له‌ باره‌ی چۆنییه‌تیی میوانداریكردنی مۆندیالی 2018ـی رووسیا ده‌كه‌ین كه‌ بڕیاره‌ له‌ ناوه‌ڕاستی ساڵی داهاتوو به‌ڕێوه‌ بچێت.

ماڕادۆنا پێشر راشیگه‌یاندووه‌ كه‌ به‌ ڤیدل كاسترۆی سه‌رۆكی كۆچكردووی پێشووی وڵاتی كۆبا و سه‌رۆكی كۆچكردووی پێشووی ڤێنزویلا (هۆگۆ چاڤێز) سه‌رسامه‌ و پێشتر په‌یوه‌ندییه‌كی به‌هێزی له‌ نزیكه‌وه‌ له‌گه‌ڵ ئه‌و دوو سه‌رۆكوڵاته‌ كۆچكردووه‌ هه‌بووه‌.

بڕیاره‌ له‌ هاوینی ساڵی داهاتوو له‌ 14/6 بۆ یه‌كه‌مجار له‌ مێژوودا جامی جیهانی 2018 له‌ رووسیا به‌ڕێوه‌ بچێت و له‌ 15/7 پاڵه‌وانییه‌تییه‌كه‌ كۆتایی دێت، یارییه‌كانیش له‌ 12 یاریگه‌ و له‌ 11 شاری جیاجیا به‌ڕێوه‌ ده‌چێت كه‌ پێكهاتوون له‌م شارانه‌ (مۆسكۆ، سان پترسبۆرگ، كالینیگراد، كازان، ڤۆڵگوگراد، نیجنی نۆڤگۆرود، وسمارا، وسارانسك، رۆستۆڤ، سوتچی و ویكاترینبۆرگ).