هۆشداری لە پشێوی ناوخۆی ئێران دەدرێت
ھەڕەشەی رووبەڕوو بوونەوە لە بەرەیەك دەكرێت
K24 - ھەولێر
دەسەڵاتی دادوەری ئێران هۆشداری دەدات لە ئەگەری سەرهەڵدانی فیتنە و پشێوی و هەڕەشەی روبەڕوو بوونەوەی توندیش لەو کەسانە دەکات کە لە هەوڵی تێکدانی ئاسایشی ناوخۆيی ئێرانن.
غوڵام حوسێن موحسێنی ئێژەیی گوتەبێژی دەسەڵاتی دادوەری ئێران، لە گوتاری نوێژی هەینی تاران رایگەیاند، هێرشکردنەسەر سوپای پاسداران و رێکخراوی بەسیج و دەسەڵاتی دادوەری لە لایەن ژمارەیەک لە بەرپرسانەوە، مەترسی سەرهەڵدانی فیتنە و پشێوی لێدەکەوێتەوە.
ئێژەیی بە ئاماژە بە ئەبولحەسەن بەنی سەدر یەکەمین سەرۆک کۆماری ئێران، رایگەیاند، چارەنووسی ئەو کەسانەی دەنگی خەڵک بۆ هێرشکردنەسەر دامەزراوەکانی دیکە بەکاردەهێنن، چارەنووسیاڤ وەكو بەنی سەدر دەبێت.
ئەو لێدوانەی وتەبێژی دەسەڵاتی دادوەری ئێران، ئاماژەیەکە بۆ ناکۆکییەکانی نێوان حەسەن روحانی سەرۆک کۆماری ئێران و سوپای پاسداران کە لە ماوەی رابردوودا بە توندی هێرشیان کردبووە سەر سیاسەتەکانی یەکتر.