پەرلەمانی ئێران پڕۆژە یاسایەك بۆ رووبەڕوو بوونەوەی ئەمریكا ئامادە دەكات
"پڕۆژەكە لە 10 بەش و 20 خاڵ پێكھاتووە"
K24 - ھەولێر
كازم جەلالی، سەرۆكی ناوەندی توێژینەوەی پەرلەمانی ئێران رایگەیاند، بە ھەماھەنگی لەگەڵ لیژنەی ئاسایشی نەتەوەیی و سیاسەتی دەرەوەی پەرلەمان، پرۆژەیاسایەكیان دژ بە دەستێوەردانەكانی ئەمریكا و ھەوڵەكانی دژ بە ئێران ئامادە كردووە و لە چەند رۆژی داھاتوودا لە دانیشتنی ئاسایی پەرلەمان دەخرێتە دەنگدانەوە.
بە گوتەی ئەو ئەندامەی پەرلەمانی ئێران، پرۆژە یاساكە لە 10 بەش و 20 خاڵ پێكھاتووە كە تایبەتە بە رووبەڕووبوونەوەی ھەوڵەكانی ئەمریكا و سیاسەتە دوژمنكارانەی ئەو وڵاتە بەرانبەر بە ئێران .
ھەفتەی رابردوو سێناتی ئەمریكا پرۆژەیاسای گەمارۆ نوێكانی سەر ئێرانی پەسەند كرد و ئێرانیش ئەو بڕیارە بە بەردەوامی ھەوڵەكانی ئەمریكا دژ بە وڵاتەكەی دەزانێت.