سیاسی

له‌ ئێران به‌هۆی لافاوه‌وه‌ 14 كه‌سی گیانیان له‌ ده‌ستدا

37 كه‌سیش بێ سه‌روشوێنن

ئێران ئێران لافاو

K24 - هه‌ولێر:‌

رۆژی هه‌ینی، بارانی به‌ خوڕ، باكووری رۆژئاوای ئیرانیشی گرته‌وه‌ و به‌گوێره‌ی ئاژانسی فه‌رمی هه‌واڵی ئێران و ته‌له‌ڤیزیۆنه‌كانی ئه‌و وڵاته‌، لافاوێكی زۆر هه‌ستاوه‌ و به‌و هۆیه‌وه‌ 14 كه‌س لافاو خنكاندوونی و 37 كه‌سی دیكه‌ش بێسه‌روشوێن بوون.

له‌وباره‌وه‌ به‌رپرسی پۆلیسی ناوچه‌ی "ئه‌جابشێر" به‌ ئاژانسی "ئیرنا"ـی گوتووه‌" ته‌رمی 12 كه‌س له‌وانه‌ی گیانیان له‌ ده‌ستدابوو دۆزراونه‌ته‌وه‌، 3 كه‌سیان ژنن و 9 كه‌سیشیان پیاون".

كه‌ناڵی ته‌له‌ڤیزیۆنی فه‌رمی ئێرانیش رایگه‌یاندووه‌" دوو كه‌س له‌ شاری ئازه‌رشه‌هر، به‌هۆی لافاوه‌وه‌ مردوون و 37 كه‌سی دیكه‌ش تا ئێستا بێسه‌روشوێنن، ئه‌و ناوچه‌یه‌ش ده‌كه‌وێته‌ پارێزگای ئازربایجانی رۆژهه‌ڵاته‌وه‌.

به‌گوێره‌ی ئه‌و گرته‌ ڤیدیۆیانه‌ی بڵاوكراونه‌ته‌وه‌، لافاوێكی زۆر هه‌ستاوه‌ و له‌ یه‌كێك له‌ دیمه‌نه‌كاندا، كه‌سێك به‌ پایسكیل به‌ ناو لافاوه‌كه‌دا ده‌ڕوات و له‌ ناكاو ده‌كه‌وێت و لافاوه‌كه‌ش رایده‌ماڵێت و له‌ به‌رزاییه‌كه‌وه‌ ده‌یخاته‌خواره‌وه‌، ئه‌و كه‌سانه‌شی له‌و ده‌وروبه‌ره‌دان، ده‌یانه‌وێت رزگاری بكه‌ن، به‌ڵام بێسووده‌ و سه‌ره‌نجام جگه‌ له‌ هاتوهاوار هیچی دیكه‌یان بۆ ئه‌و كه‌سه‌ پێنه‌كراو لافاوه‌كه‌ بردوویه‌تی و گیانی له‌ ده‌ستداوه‌".

کوردستان24 دیجیتاڵ میدیا ,