مەعسووم و جبووری داوای گفتوگۆی جددی لەنێوان هەولێر و بەغدا دەکەن

K24 - ھەولێر

سەرۆك کۆمار و سەرۆکی پەرلەمانی عێراق داوادەکەن، گفتوگۆی جددی لەنێوان هەولێر و بەغدا دەستپێبکاتەوە.

نووسینگەی سەرۆکی پەرلەمانی عێراق بڵاویکردەوە، فوئاد مەعسووم، سەرۆك کۆماری عێراق و سەلیم جبووری، سەرۆكی ئەنجوومەنی نوێنەرانی عێراق، لەبارەی کێشەکانی نێوان هەولێر و بەغدا و گەڕانەوەی ئاوارەکان بۆ سەر زێد و ماڵی خۆیان کۆبوونەوە.

لە راگەیەندراوەکەدا هاتووە، هەردوولا جەختیان لەسەر دەستپێکردنی گفتوگۆی جددی لەنێوان هەولێر و بەغدا بۆ چارەسەرکردنی کێشەکانی نێوانیانکردەوە، هەروەها داوایان کرد، کاتێك بۆ گەڕانەوەی ئاوارەکان و بوونیادنانەوەی ناوچەکانیان دیاریبکرێت.

 ئاماژەیان بەوەشدا، شەڕی داهاتووی عێراق شەڕی بوونیادنانەوەی ناوچە کۆنترۆڵکراوەکان دەبێت.

ئەمە لەكاتێكدایە لە چەند رۆژی رابردوودا سەرۆك كۆماری عێراق لە سەردانێكدا بۆ ھەولێر لەگەڵ سەرۆك بارزانی و سەرۆكی حكومەتی ھەرێمی كوردستان تاوتوێی دەستپێكردنەوەی گفتوگۆی نێوان ھەولێر و بەغدا و چارەسەری كێشەكانیان كرد.