پهرلهمانی كوردستان: لێدوانهكانی عهبادی مەترسی و هەڕەشەن لەسەر ئاییندەی عێراق
سهرۆكایهتی پهرلهمانی كوردستان وهڵامی حهیدهر عهبادی دهداتهوه
K24 - ههولێر:
سهرۆكایهتی پهرلهمانی كوردستان، وهڵامی لێدوانێكی حهیدهر عهبادی، سهرۆك وهزیرانی عێراق دهداتهوه كه له رۆژی 6/12/2017 رایگەیاندبوو "رێگریكردن لە دابەشبوونی عێراق سەركەوتنێكی دیكە بوو، كە هیچی كەمتر نەبوو لە سەركەوتن بەسەر تیرۆریستانی داعشدا".
له راگهیهندراوهكهی سهرۆكایهتی پهرلهمانی كوردستاندا هاتووه: "ئێمە لە سەرۆكایەتی پەرلەمانی كوردستان بە شاهیدی هەموو دونیای ئاشتیخوازیش، ئەو راستییەی دووبارەدەكەینەوە، كە ئەگەر قارمانیەتی هێزی پێشمەرگەی كوردستان و حیكمەتی سەركردایەتییەكەی نەبوایە، هێزەكانی عیراق لە مۆسڵ و زۆر لە ناوچەكانی دیكەش، كە دوو ساڵ زیاتر لە ژێر كونترۆلی تیرۆریستانی داعشدابوون، نەیاندەتوانی ئەو سەركەوتنە تۆماربكەن كە ئێستا بەرێز " عەبادی " شانازیی پێوەدەكات".
له راگهیهندراوهكهدا، سهرۆكایهتی پهرلهمانی كوردستان، ئاماژه بهوهش دهكات، جێگەی سەرسورمانيشە كە "عەبادی" ئەو هێرشە سەربازییەی، كە لە رۆژی 16/10/2017 بە پشتیوانی و بەشداربوونی حەشدی شەعبی دژ بە ئیرادەی خەڵكی كوردستان كە هاووڵاتی عیراقن و ئەو تاوانانەی لە كەركووك و دوورخورماتو و ناوچەكانی تر ئەنجامدراون، بە سەركەوتن لە قەڵەمبدات و هاوشێوەی سەركەوتنی دژی تیرۆریستان وەسفی بكات".
له بهشێكی دیكهی راگهیهندراوهكهدا هاتووه: "ئێمە لە پەرلەمانی كوردستان ئەو لێدوانەی بەرێز "حەیدەر عەبادی" بە لێدوانی نا بەرپرسانە و هەڵەیەكی راشكاوانە دەزانین، چونكە دوورە لە یاسا و بەها و پرەنسیپەكانی هاووڵاتیبوون و پێچەوانەی خودی ماددەی (9)ی دەستوور هەمیشەیی عێراقیشە، كە بە هیچ شێوەیەك رێگە نادات ئەم جۆرە كردەوە لەشكریانە دژی هاوڵاتییانی عێراق ئەنجامبدرێن و شەرعییەتیشیان پێنادات".
سهرۆكایهتی پهرلهمانی كوردستان، عهبادی به پێشێلكردنی زهقی دهستوور تۆمهتبار دهكات و دهڵێت: "ئەمەش پێشێلكردنێكی دیكەی زەقی دەستوورە، كە دەخرێتە سەر ئەو پێشێلكارییە زۆرانەی دەستوور كە لە لایەن حكومەتە دوای یەكەكانی عێراق ئەنجامدراون، لە وانەش جێبەجێنەكردنی مادەی (140) ی دەستوور و ، هەر ئەم پێشێلكارییانەشبوون كە بۆنەتە هەرەشەو مەترسی بۆ پارچەبوونی عێراق و هۆی ئەوەی تیرۆریستانی داعش ئەم هەلەیە بقۆزنەوە و رێژەیەكی زۆری خاكی عیراق داگیربكەن و جینۆساید و تاوانی جۆراوجۆر ئەنجامبدەن".
له كۆتایی راگهیهندراوهكهدا هاتووه: "دووبارە، داوا لە بەرێز "عەبادی" دهكهین كە هێزی لووژیك بگرێتەبەر و دەرگای گفتوگۆ و دانوستان بەرەوڕووی هەرێمی كوردستان دانەخات و رێگەش نەدات مەرامە سیاسییە تەسكەكان، هەژموونیان بە سەر ماف و ئیرادەی گەلانی عێراق و دەستوورەكەی هەبێت؛ چونكە زەرەرمەندی یەكەم و كۆتایی لە زمانی هەرەشە و بەكارهێنانی هێز، خودی هاووڵاتییانی عێراقن و ئەم جۆرە لێدوانانەی هاوشێوەی لێدوانی بەرێز "عەبادی" مەترسی و هەرەشەن لەسەر ئایندە عێراق كە وەك وڵاتێكی مەدەنی و دیموكراسی بمێنێتەوە، بەڵام دانوستان تاكە رێگەیە بۆ رزگاربوون لە لەمپەر و تەگەرەكان و گەیشتن بە چارەسەر بۆ سەرجەم كێشەكان".