به‌ ڤيديۆ.. هۆتێلێكى له‌نده‌ن ئاگرى گرت

تا ئێستا هۆكارى سه‌ره‌كى ئاگركه‌وتنه‌وه‌كه‌ نه‌زانراوه‌

K24 – ھەولێر:

ئاگرێكى گه‌وره‌ له‌ هۆتێلێكى ناوه‌ڕاستى له‌نده‌نى به‌ريتانيا كه‌وته‌وه‌. ده‌يان كارمه‌ندى ئاگركوژێنه‌وه‌ سه‌رقاڵى كوژاندنه‌وه‌ى ئاگره‌كه‌ بوون.

به‌ گوێره‌ى زانيارييه‌ ميدياييه‌كان، ئه‌و ئاگره‌ سه‌ر له‌‌ ئێواره‌ى ئه‌مڕۆ چوارشه‌ممه‌ (6ى حوزه‌يران/ يۆنيۆى 2018) له‌ هۆتێلى (Mandarin Oriental hotel) كه‌وتووه‌ته‌وه‌، كه‌ ده‌كه‌وێته‌ ناوه‌ڕاستى شارى له‌نده‌ن.

وه‌ك له‌ گرته‌ ڤيديۆى رووداوه‌كه‌دا ده‌رده‌كه‌وێت، دووكه‌ڵى ره‌ش له‌ هۆتێله‌كه‌ به‌رز ده‌بێته‌وه‌. كارمه‌ندانى ئاگركوژێنه‌وه‌، كه‌ ژماره‌يان به‌ (100) كارمه‌ند ده‌خه‌مڵێنرێت، سه‌رقاڵى كوژاندنه‌وه‌ى ئاگره‌كه‌ن.

به‌ هۆى ئه‌و رووداوه‌وه‌، پۆليس ژماره‌يه‌ك هێڵى گواستنه‌وه‌ى به‌ره‌و ناوچه‌ى رووداوه‌كه‌ داخست و لێكۆڵينه‌وه‌يان بۆ زانينى هۆكارى ئاگركه‌وتنه‌وه‌كه‌ ده‌ستپێكرد.

تا ئێستا هۆكارى سه‌ره‌كى ئاگركه‌وتنه‌وه‌كه‌ نه‌زانراوه‌.

سه‌رچاوه‌: رووسياليه‌وم، تويته‌ر

ئ.ر