رۆژھەڵاتی كوردستان بە مانگرتن وەڵامی مووشەكەكان دەداتەوە

K24 - ھەولێر

لە زۆربەی شارەکانی رۆژهەڵاتی کوردستان لەسەر داوای کەمپەینی مانگرتنی گشتی دوکان و بازاڕەکان داخراون و خەڵك لە ماڵەکانیان نەهاتوونەتە دەر. لەو مانگرتنەدا خەڵكی رۆژھەڵاتی كوردستان دەیانەوێت وەڵامی ئەو ھێرشە مووشەكییەی سەر بارەگاكانی حزبی دیموكرات بدەنەوە.

ئەمڕۆ چوارشەممە 12/9/2018، مانگرتنی گشتی لە زۆربەی شارەکانی رۆژهەڵاتی کوردستان دەستیپێکردووە، بەپێی ئەو گرتە ڤیدیۆیانەی کە تایبەت بۆ کوردستان24 نێردراون لە شارەکانی مەریوان، شنۆ، مەهاباد، سنە، سەردەشت، سەقز، بانە و لە بەشێك لە کرماشان خەڵك دوکان و بازاڕەکانیان داخستووە و لە ماڵەکانیان نەهاتوونەتەدەر.

لەدوای هێرشی مووشەکی سوپای پاسداران بۆ سەر بارەگاکانی حزبی دیموکراتی کوردستان و حزبی دیموکراتی کوردستانی ئێران لە کۆیە کەمپەینی مانگرتنی گشتی و ناوەندی هاوکاری حزبەکانی رۆژهەڵاتی کوردستان داوایان لە خەڵك کردبوو کە ئەمڕۆ وەکو کاردانەوەیەك لەهەمبەر ئەو هێرشە مووشەکییە و هاوکات لەسێدارەدانی بەندکراوانی سیاسی لە ماڵەکانیان نەهێنەدەر و مانگرتنی گشتی رابگەیەنن.