بازاڕی لەنگەی ھەولێر ئاگری گرت

K24 - ھەولێر

لە درەنگانی شەوی رابردووەوە بازاڕی لەنگەی ھەولێر ئاگری گرتووەو تائێستا ئاگرەكە كۆنترۆڵ نەكراوە.

كاسبكارێكی بازاڕی لەنگەی ھەولێر بە كوردستان24 راگەیاند: "لە درەنگانی شەوی رابردووەوە بازاڕی لەنگە ئاگری گرتووە، زۆر لە دوكانەكان سوتاون، من یەكێكم لەوانەی سێ دوكانم سوتاوە".

گوتیشی: "ھەرچەندە تیمەكانی ئاگر كوژێنەوەی بەرگری شارستانی ھاتوون، بەڵام تائێستا نەیانتوانیوە ئاگرەكە كۆنترۆڵ بكەن".

بەپێی زانیارییەكانی كوردستان24، تیمەكانی ئاگرکوژێنەوەو پۆلیسی فریاکەوتن لە ھەر دوو رووی شەقامی 100 مەتری و 40 مەتری ھەوڵی کۆنترۆڵکردنی ئاگرەکە دەدەن.

ئاراس ئەحمەد، پەیامنێری كوردستان24 لە شوێنی رووداوەكە رایگەیاند: "تائێستا ھۆكاری ئاگركەوتنەوەكە دیار نییە و رووداوەكە لە درەنگانی شەو روویداوە و زوو ھێزەكانی بەرگری شارستانی ئاگادار نەكراونەتەوە، بۆیە ئەوكاتەی تیمەكانی ئاگركوژێنەوە ھاتوونەتە شوێنی رووداوەكە ئاگر تەشەنەی كردووە".

نەبەز عەبدولحەمید، قایمقامی هەولێر بە کوردستان24ی راگەیاند: "دوو هەزار و 400 دوکان لە بازاڕی لەنگەی هەولێر هەن،  کاتژمێر 3 و نیوی بەرەبەیانی ئەمڕۆ ئاگر لە بازاڕەکە کەوتووەتەوە و زیاتر لەنیوەی دوكانەكانی ئەو بازاڕە سووتاون".

 گوتیشی: "لە رێگەی هێلیکۆپتەری بەرگری شارستانی هەوڵ بۆ کۆنترۆڵکردنی ئاگرەکە دەدەین، هەروەها بۆ زانینی هۆکاری ئاگرکەوتنەوەکە چاوەڕوانی راپۆرتی تیمی بەرگری شارستانین".

قایمقامی ھەولێر ئاماژەی بەوەشدا: "رووداوەكە هیچ زیانێکی گیانی لێ نەکەوتووەتەوە".