مێسی بۆ رووبه‌ڕبوونه‌وه‌ی ئینته‌ر میلان بانگهێشتی بارسێلۆنا كرایه‌وه‌

ڤاڵڤێردی پێكهاته‌ی تیپه‌كه‌ی بۆ یارییه‌كه‌ی به‌رامبه‌ر ئینته‌رمیلان له‌ چامپیۆنزلیگ راگه‌یاند و لیۆنێل مێسی سه‌ركرده‌ش ناوی له‌ لیسته‌كه‌دایه‌.

مێسی به‌هۆی ئه‌و پێكانه‌ی دوو هه‌فته‌ له‌مه‌وبه‌ر له‌ یارییه‌كه‌ی بارسا به‌رامبه‌ر سێڤییا تووشی بوو له‌ یاریكردن دابڕا و نه‌یتوانی له‌ كلاسیكۆ یاریی بكات، گومانیش هه‌بوو به‌رامبه‌ر ئینته‌رمیلان یاریی نه‌كات.

به‌ڵام ئه‌م یاریزانه‌ له‌لایه‌ن راهێنه‌ره‌وه‌ بانگهێشتكراوه‌ و گه‌شتی ئیتاڵیا ده‌كات.

له‌ لیسته‌كه‌ی بارسێلۆنا هه‌ریه‌كه‌ له‌ تۆماس فێرمایلی و ساموێل ئۆمتیتی ناویان تۆمار نه‌كراوه‌ و به‌هۆی پێكانه‌وه‌ دووركه‌وتوونه‌ته‌وه‌.

بڕیاره‌ رۆژی سێشه‌ممه‌ بارسێلۆنا له‌ گه‌ڕی چواره‌می قۆناخی كۆمه‌ڵه‌كانی چامپیۆنزلیگ ببێته‌ میوانی ئینته‌رمیلان.