ئەنجوومەنی وەزیران پشكی كورد لە بودجەی عێراق تاوتوێ دەكات
سەرجەم وەزیرەكان بەشداری كۆبوونەوەكە دەكەن
K24 - ھەولێر
ئەنجوومەنی وەزیرانی هەرێمی کوردستان لە كۆبوونەوەدایە و بە گوێرەی زانیارییەكان لە كۆبوونەوەكەدا پشكی هەرێمی کوردستان لە بودجەی گشتی عێراق تاوتوێ دەكرێت و ھەروەھا بڕیارە ئەنجوومەنی وەزیران تێبینی و سەرنجەکانی لەسەر پڕۆژە یاسای بودجە بە نوێنەرانی کورد لە بەغدا بدات.
هەر لە کۆبوونەوەکەدا ئامادەکردنی بودجەی کوردستان تاوتوێ دەکرێت.
ئاراس ئەحمەد، پەیامنێری كوردستان24 رایگەیاند: "كەمێك پێش ئێستا كۆبوونەوەكە بە سەرپەرشتی نێچیرڤان بارزانی، سەرۆكی ئەنجوومەنی وەزیران و بە ئامادەبوونی سەرجەم وەزیرەكان دەستیپێكرد. كۆبوونەوەكە یەك تەوەر لەخۆ دەگرێت ئەویش پشكی كوردە لە پڕۆژە یاسای بودجەی عێراق".
بە گوێرەی زانیارییەكانی پەیامنێرمان: "پەرلەمانتارانی كورد لە لیژنەی دارایی پەرلەمانی عێراق چەند پێشنیارێكیان سەبارەت بە پشكی كورد و مووچەی فەرمانبەران و پێشمەرگە و نەوت داوەتە ئەنجوومەنی وەزیرانی ھەرێمی كوردستان، یەكێك لە پێشنیارەكان ئەوەیە كە مووچە بەدەربێت لە رێككەوتن لەسەر داھاتی نەوت".
بەپێی نوێنەرانی کورد لە ئەنجوومەنی نوێنەرانی عێراق بەشی هەرێمی کوردستان و مووچەی فەرمانبەران و پێشمەرگە لە بودجەی گشتی عێراق جێگیرکراوە و بڕیارە لە رۆژانی داهاتوو پرۆژە یاسای بودجەی گشتی عێراق دەنگی لەسەر بدرێت.