چەند ئەندامێکی دیکەی کۆمەڵی ئیسلامی دەستیان لەکار کێشایەوە
هۆکارەکەی ئاشکرا دەکەن
K24 – ههولێر:
بە هۆی "بە خێزانیکردن" و "نایەکسانی" لەناو کۆمەڵی ئیسلامی، سێ ئەندامی ئەو حزبە لە راگەیندراوێکدا دەست لەکارکێشانەوەی خۆیان راگەیاند.
هەر یەک لە ژوان عهیدولڕهزاق، بەرپرسی نووسینگەی هەولێری رێكخراوی قوتابیانی كۆمەڵ و ئەندامی نووسینگەی هەولێری دەستەی یاساناسانی كۆمەڵ؛ زەیتوون عوسمان، كارگێڕی نووسینگەی هەولێری رێكخراوی قوتابیانی كۆمەڵ و راگەیاندكاری كۆمەڵ لە هەولێر؛ ئەمین سەعدی، ئەندامی بەشی كارگێڕی و دارایی مەڵبەندی 3ی هەولێر، وازیان لە کۆمەڵی ئیسلامی هێناوە و هۆکارەکەی ئاشکرا دەکەن.
بە گوێرەی راگەیندراوێکی ئەو سێ ئەندامەی کۆمەڵ: "ئەو كەسانەی لەم قۆناغەدا و لهناو حزبدا كاربەدەست و دەست رۆیشتوون، سەرتاپای حزبیان خستۆوهتە خزمهتی بەرژەوەندیی ئامانجە تاكی و خێزانییەكانی خۆیان".
ئەو سێ ئەندامە دەڵێن: " ماوەی یەک ساڵە چاوەڕێی چاکسازی و نەهێشتنی گەندەڵین، بەڵام هیچ هەنگاوێک بەو ئاراستەیە نەنراوە".
پێشتریش، سێ ئەندامی سەرکردایەتی و چەند ئەندامێکی باڵای کۆمەڵی ئیسلامی وازیان لەو حزبە هێنا بوو، هۆکارەکەشیان بۆ بوونی گەندەڵی و نایەکسانی گەڕاندەوە.
دەقی بڵاوکراوەکەی سێ ئەندامەکەی کۆمەڵ:
بە ناوی خوداوەندی بەرز و باڵا
بۆ: كۆمەڵی ئیسلامی و ڕای گشتی
بابەت: وازنامە
دوای چەندین ساڵ خزمەت و شەونخونی و هەوڵ و ماندونەناسی لە خزمەت پڕۆژەیەكی سیاسی ئیسلامی بە ناوی ( كۆمەڵی ئیسلامی كوردستان ) بەو بڕوا و متمانەیەی كە حزب هۆكارێكە بۆ خزمەتی دین و ژینی گەل و نەتەوە
خزمەتی زۆر مان بە قوتابیان و گەنجانی ئەم نیشتیمانە كرد و زۆر خشتمان بۆ ئەم حزبە خستە سەردیوار و هەوڵی بەرەو پێشچوونیمان دا
بەڵام دوای ئەوەی كە لەوە تێگەیشتین كە
1- ئەو كەسانەی لەو قۆناغەدا كار بەدەست و دەست ڕۆیشتوون لە حزب دا پێچەوانەی ئەوە بیر و ڕایانە و سەرتاپای حزبیان خستۆتە بەرژەوەندی ئامانجە تاكی و خێزانیەكانی خۆیان
2- نەبوونی پرۆژەیەكی سیاسی گشتگیر لەو حزبە دا بەجۆرێك خزمەتی گشت چین وتوێژەكانی كۆمەڵگەی كوردی بكات بێ جیاكاری لە نێوان تاكەكانی
ئەمانە و چەندان نادادی و گەندەڵی و قۆرخكاری تر
ناچاریان كردین كە هەوڵی زۆر و كاردانەوە و هەڵوێستی زۆر و جیاوازمان نواند
كۆتا جار زیاتر لە ساڵێكە بێ دەنگ دانیشتووین و چاوڕوانی بڕیارێكی بە خۆداچوونەوە و بڕیارێكی دروستی سەركردایەتی و كاردبەدەستانی ئەم حزبە بووین كە هەنگاوێك بێت بۆ چاكسازی و پاكسازی نەهێشتنی ململانێ و دۆخی نائاسایی و گەندەڵیەكانی ئەو حزبە
وەلێ هیچ هەنگاوێكمان بەدی نەكرد و گەیشتین بەو قۆناغەی تروسكاییەك لە ئومێد بەدی نەكەین
بۆ یە ناچار بەو بڕیارە بووین
كە لە ئەمڕۆ وە 27/4/2019 ڕای بگەیەنین كە هیچ پەیوەندیەكی سیاسی و یاساییمان بەو حزبەوە نامێنی
وە لێرەوە پشتگیری خۆمان بۆ هەر سێ ئەندامی سەركردایەتی دەستلەكاركێشاوەی كۆمەڵ ڕادەگەیەنین دوپاتی بەرنگاربوونەوەی گەندەڵی و قۆرخكاری دەكەینەوە.
ژوان عبدالرزاق، بەرپرسی نوسینگەی هەولێری رێكخراوی قوتابیانی كۆمەڵ و ئەندامی نوسینگەی هەولێری دەستەی یاساناسانی كۆمەڵ
زەیتون عوسمان، كارگێڕی نوسینگەی هەولێری رێكخراوی قوتابیانی كۆمەڵ و راگەیاندكاری كۆمەڵ لە هەولێر
أمین سعدی، ئەندامی بەشی كارگێڕی و دارایی مەڵبەندی 3 ی هەولێر
H.J