جارێکی دیکە جەنگ بەرۆکی ئیدلب دەگرێت

K24 – هه‌ولێر:

پەیوەندی رووسیا و تورکیا لەسەر ئیدلب بەرەو خراپی دەچێت و جارێکی دیکە ئەگەری روودانی جەنگ دێتە ئاراوە.

هێزەکانی حکوومەتی سووریا و سوپای رووسیا چەند جارێک هێرشی ئاسمانیان کردووەتە سەر باکووری رۆژئاوای سووریا و میلیشیاکان، بنکەکانی تورکیاش بەرکەوتوون.

جارێکی دیکە ئیدلب دەبێتە ناوچەی جێناکۆکی نێوان رووسیا و تورکیا بەوەی حکوومەتی سووریا دەیەوێت دواین پێگەی چەکدارە یاخییەکانی سووریا کۆنتڕۆڵ بکات و ئەنقەرە رێگری لێ دەکات.

لە ماوەی پێنج رۆژی رابردوو، بۆردومان و شەڕ لەوناوچانە دەستیپێکردووەتەوە و بەگوێرەی راگەیەندراوێکی وەزارەتی بەرگری تورکیا، لە بۆردومانەکان، دوو سەربازی تورکیاش برینداربوون.

لەبارەی زیانەکان، نەتەوە یەکگرتووەکان لە راپۆرتێکیدا نووسیویەتی، دەیان خەڵکی سڤیل گیانیان لەدەستداوە و بەرمیلە پڕ تەقەمەنییەکانی رژێم، نەخۆشخانە و قوتابخانەکان دەکەنە ئامانج.

بەشار ئەسەدی سەرۆکی سووریا سوورە لەسەر ئەوەی تەواوی خاکی سووریا کۆنتڕۆڵبکاتەوە و بۆ ئەوەش پشت بە رووسیا و ئێران دەبەستێت، بەڵام تورکیا رێگرە.

سێ ملیۆن کەس لە ئیدلب و دەوروبەری دەژین، ئەو ناوچەیەش بووەتە ماڵی گروپە تیرۆرستی و جیهادییەکان، پێشتریش ئەنقەرە و مۆسکۆ رێککەوتن کە بە دانووستان و بەبێ جەنگ کێشەکانی ئیدلب چارەسەربکەن، بەڵام رەنگە ئەو رێککەوتنە کۆن بووبێت و سووریا و رووسیا هێرشی سەر ئیدلب دەستپێبکەن.

Reuters

H.J