بەردانەوەی ئاوی زێی بچووک رێگای چەند گوندێک لە پشدەر دەگرێت

K24 – هه‌ولێر:

بەهۆی بەرزبوونەوەی ئاوی زێی بچووک و بەردانەوەی بەشێکی ئاوەکە لەلایەن ئێرانەوە، رێگای هاووڵاتیانی 14 گوندی بناری ئاسۆس بە رووی سنووری پشدەردا دەگیرێت.

بەکر بایز، قایمقامی قەزای پشدەر بە کوردستان 24ی راگەیاند: "ئێران بەشێکی ئاوی زێی بچوکی بەرداوەتەوە و بەو هۆیەوە بەیانی ئەمڕۆ بەشێک لەو پردانەی هاووڵاتیانی گوندەکانی بناری ئاسۆس بەهاوکاری حکوومەت لەسەر ئاوی زێیەکە دروستیان کردوە تێکچوون و ڕێگای پەڕینەوە داخراوە".

بە وتەی گوندنشینان، ئەو هاووڵاتیانەی بەیانی ئەمڕۆ بە ئۆتۆمبێل لە پشدەرەوە بەرەو گوندەکانی بناری ئاسۆس چونەتە سەر زەویە کشتوکاڵیەکانیان رێگایان لێ گیراوە .

لە یەکی حوزەیرانی ساڵی 2017، ئێران بۆ پڕکردنی بەنداوی "کۆڵەسە" لە سنووری سەردەشت ئاوی زێی بچوکی بەڕووی باشوری کوردستاندا گرتۆتەوە.

H.J