بۆ یه‌كه‌م جار دوو گه‌نجی كورد له‌ مۆسكۆ به‌شداری له‌ كۆڕبه‌ندی گه‌نجانی جیهاندا ده‌كه‌ن

K24- مۆسكۆ:

بۆ یه‌كه‌م جار دوو گه‌نجی كورد ده‌چنه‌ وڵاتی رووسیا و به‌ نوێنه‌رایه‌تی گه‌نجانی هه‌رێمی كوردستان به‌شداری له‌ كۆڕبه‌ندی جیهانی گه‌نجاندا ده‌كه‌ن.

په‌یامنێری كوردستان 24 له‌ مۆسكۆ رایگه‌یاند، هه‌ریه‌ك له‌ په‌یوه‌ند سوبحی، فاوه‌نده‌ری رێكخراوی "WAH" و محه‌مه‌د عه‌باس فاوه‌نده‌ری رێكخراوی " Alliance for Humanity - AH"، بۆ یه‌كه‌م جار وه‌ك نوێنه‌ری گه‌نجانی كوردستان له‌ شاری ئۆریبۆرگی وڵاتی رووسیا به‌ ئاڵای كوردستانه‌وه‌ به‌شداری له‌ كۆڕبه‌ندی جیهانیدا ده‌كه‌ن، كه‌ كۆڕبه‌نده‌كه‌ 4 ساڵ جارێك ساز ده‌كرێت و له‌لایه‌ن ڤلادیمێر پوتن، سه‌رۆكی رووسیاوه‌ پشتیوانی ده‌كرێت.

ئه‌مساڵ 500 كه‌س له‌ 100 وڵاتی جیاواز بۆ ئه‌و كۆڕبه‌نده‌ بانگهێشت كراون و ئه‌مڕۆ ده‌ستی پێكردووه‌ و بۆ ماوه‌ی 6 رۆژ به‌رده‌وام ده‌بێت.

له‌ كۆڕبه‌نده‌كه‌دا چه‌ندین پانێڵ، میتینگ، دیبه‌یت و چالاكی جۆراوجۆر پێشكه‌ش ده‌كرێن.

ئه‌و دوو گه‌نجه‌ی كوردستان به‌ پێشكه‌شكردنی دوو پڕۆژه‌ به‌شدارییان كردووه‌، پڕۆژه‌یه‌كیان بۆ دابینكردنی كۆرسی جیاوازه‌ بۆ هه‌ولێر و سلێمانی و هه‌ڵه‌بجه‌ له‌ سێکتەره‌كانی نەهێشتنی نەخوێندەواری، ھۆشیاری ژینگەیی، ھۆشیاری تەندروستی، دابین کردنی ھەلیکار و کۆرس بەفریی.

پڕۆژه‌یه‌كی دیكه‌شیان بۆ شاری كه‌ركووك پێشكه‌شكردووه‌، كه‌ تایبه‌ته‌ به‌ بواری ژینگه‌ و سه‌وزكردنی خاك.

ئه‌و دوو گه‌نجه‌ی كوردستان له‌ كۆڕبه‌نده‌كه‌دا وتاری تایبه‌تیان له‌باره‌ی ئاست و رۆڵی گه‌نج له‌ كوردستان و عێراق ده‌بێت.

H.B