لە سلێمانی زبڵ و خاشاك لە یەكتر جیا دەكرێتەوە

K24 - سلێمانی

بە مەبەستی پاراستنی ژینگە و تەندروستی ھاووڵاتیان، قایمقامییەتی سلێمانی بڕیاریدا لە هەموو خواردنگە و یەكەكانی نیشتەجێبوون لە سلێمانی پاشماوەكانی (پلاستیك، شوشە، ماددەخۆراكییەكان) لەیەكتر جیا بكرێنەوە.

قایمقامیەتی سلێمانی لە راگەیەندراوێكدا دەڵێ: "قایمقامیەتی سلێمانی دەبێتە یەكەم فەرمانگەی حكوومی لەسەر ئاستی عێراق و هەرێمی كوردستان كە پاشماوەكانی زبڵ و خۆڵ و خاشاك لەیەك جیا دەكاتەوە، ئاماژە بەوەشكراوە، ئامانجیان لەم كارە پاراستنی ژینگە و تەندروستی هاووڵاتیان و هۆشیاركردنەوەی خەڵكە لە مەترسییەكانی پسبوونی ژینگە".

وەك لە راگەیەندراوەكە ئاماژەی پێكراوە: "قایمقامی سلێمانی بڕیاریدا بۆ پاراستنی ژینگە و لایەنی تەندروستی هاووڵاتیان لە هەموو رێستۆرات و خواردنگەو یەكەكانی نیشتەجێبوون لە سلێمانی پاشماوەكانی (پلاستیك، شوشە، ماددەخۆراكییەكان) لەیەك جیا بكرێتەوە، هەر لەسەر فەرمانی قایمقامی سلێمانی بڕیاردرا وەك یەكەم فەرمانگەی حكوومی لەسەر ئاستی عێراق و هەرێمی كوردستان  قایمقامیەتی سلێمانی دەستپێشخەری بكات، بۆ جیاكردنەوەی پاشماوەكانی پلاستیك، شوشە، ماددەخۆراكییەكان". 

ئاوات محەمەد، قایمقامی سلێمانی راشیگەیاندووە: "پاراستنی ژینگە ئەركی هەموو تاكێكی هەرێمی كوردستانە و پێویستە هەمووان بەو پەڕی پەرۆشیەوە كاربكەن بۆ پاراستنی ژینگە، لەبەرئەوەی پیسبوونی ژینگە زیانی بۆ هەموو تاكێكی كۆمەڵگە دەبێت".

قایمقامی سلێمانی هیواخوازە لەپێناو پاراستنی ژینگە و لایەنی تەندروستی هەموو فەرمانگە حكوومی و ناحكوومیەكان بەشداربن لەم هەنگاوەدا.

ھ.م