پارێزگای ھەڵەبجە 9 ژمارەی نایابی ئۆتۆمبێل دەفرۆشێت
لە ژمارە 1 دەست پێدەكات
K24 - ھەڵەبجە
لە كۆنگرەیەكی رۆژنامەوانیدا پارێزگاری ھەڵەبجە و بەڕێوەبەری ھاتووچۆی ھەڵەبجە ئاشكرایان كرد كە دەست دەكەن بە فرۆشتنی ژمارە نایابەكانی ئۆتۆمبێل و لە ھەنگاوی یەكەمدا 9 ژمارە بە شێوەی زیادكردنی ئاشكرا دەفرۆشرێن.
بەگوێرەی نووسراوێك كە وێنەیەكی دەست كوردستان24 كەوتووە و واژۆی جێگری پارێزگاری ھەڵەبجەی بەسەرەوەیە 9 ژمارەی نایابی ئۆتۆمبێلی پارێزگای ھەڵەبجە لە ژمارە 1 تا 9 بەشێوەی زیادكردنی ئاشكرا دەفرۆشرێن.
لە نووسراوەكەدا ھاتووە: "بۆ جاری یەكەم بەھەماھەنگی ھاتووچۆی ھەڵەبجە ژمارە نایابەكانی (1،2،3،4،5،6،7،8،9) جۆری تایبەت بە رێگەی زیادكردنی ئاشكرا بەپێی یاسای فرۆشتن و بەكرێدانی موڵكەكانی دەوڵەت بە ژمارە 32ی ساڵی 1986 بەپێی ئەم مەرجانەی خوارەوە:.
1- ھەر كەسێك ئارەزووی بەشداری كردنی ھەیە پێویستە لە ماوەی 20 رۆژ سەردانی بەڕێوەبەرایەتی ھاتووچۆی ھەڵەبجە بكات و ناوی خۆی تۆمار بكات، دوا بەروار 15/9/2019.
2- پێویستە بەشداربوو پێش دەستپێكردنی زیادكردنە بارمتە (تامینات) بە رێژەی 20% نرخی خەملێنراو بۆ ھەر ژمارەی تابلۆیەك دابنێت كە بەشداری لە زیادكردنی ئاشكرای ئەو ژمارەیی تێدا دەكات.
لە نووسراوەكەی پارێزگای ھەڵەبجەدا ئاماژە بە چەند خاڵێكی دیكە كراوە.
ھ.م