شاندێكی ھەرێمی كوردستان و ئێران تاوتوێی بەرەوپێشبردنی كاری دەروازەكان دەكەن

K24 - چۆمان

ئەمڕۆ شاندێكی بازرگانی و ئیداری ھەرێمی كوردستان و كۆماری ئیسلامی ئێران، لە حاجی ئۆمەران گفتوگۆ لەسەر بەرەوپێشبردنی كاری دەروازەكان دەكەن.

عەبدوڵڵا ئاكرەیی، بەڕێوەبەری گشتیی پەیوەندییەكانی ئێران ‌و هەرێمی كوردستان، بە كوردستان24ی گوت: "ئەمڕۆ شاندێكی كۆماری ئیسلامی ئێران بە سەرپەرشتی فەرمانداری پیرانشار و پارێزگاری ئورمیە دێتە حاجی ئۆمەران، بۆ ئەوەی گفتوگۆ لەسەر باشتركردنی كارەكانی ئەو دەروازە سنوورییە و نەھێشتنی گرفتەكان بكەین".

راشیگەیاند: "پەیوەندییەكانمان لەگەڵ كۆماری ئیسلامی ئێرانەوە لە ھەموو رووێكەوە زۆر باشە و ھەوڵدەدەین بەرەو باشتری ببەین".

ھەروەھا ئەحمەد قادر، قایمقامی چۆمان بە كوردستان24ی راگەیاند: "كۆبوونەوەی ئەمڕۆ لەگەڵ شاندی ئێران، بۆ بەرەوپێشبردنی كارەكانی دەروازەی سنووری حاجی ئۆمەران - مەرزی تەمەرچین، و چارەسەركردنی گرفتەكانە".

ھ.م