زەریف: شەرمەزاری ئێرانییەکانین

K24 - ھەولێر

وەزیری دەرەوەی ئێران رایدەگەیەنێت، بەھۆی كەوتنەخوارەوەی فڕۆكەیەکی ئۆكراینی شەرمەزاری ئێرانییەکان و ھاووڵاتیانن.

محەمەد جەواد زەریف، وەزیری دەرەوەی ئێران لە ھەژماری تایبەتی خۆی لە ئینستاگرام جارێكیتر بەھۆی رووداوی كەوتنە خواری فڕۆكەی بوئینگ 737-ی ئۆكراینی داوای لێبوردنی كرد، و دەڵێ "گرنگ نییە كێ ئەو ھەڵەیەی كردووە، بەڵكو گرنگ ئەوەیە بەھۆی ئەو تراژیدیا مێژووییە ھەموومان دەبێ شەرمەزاری ئێران و ھاووڵاتیانی ئێران بین".

 وەزیری دەرەوەی ئێران راشیگەیاند "وەكو ھاووڵاتییەكی ئاسایی پرسەداری ئەو كارەساتەم".

رۆژی چوارشەممەی رابردوو 8/1/2020، فڕۆكەیەكی ئۆكراینی سەر بە كۆمپانیای بۆینگ، لە تاران كەوتەخوارەوەو 176 سەرنشین و ستافی فرۆكەكە گیانیان لەدەستدا. نزیكەی 10 كەس لە سەرنشینانی فڕۆكەكە كوردی رۆژھەڵاتی كوردستان بوون.

دوای لێكۆڵینەوە لە رووداوەكە 11/1/2020، كۆماری ئیسلامی ئێران دانی بە بەئامانجگردنی فڕۆكە ئۆكراینیەكەدا دانا لە رێگەی مووشەكەوە و ئاشكراشی دەكات، بە ئامانجكردنی بەھۆی ھەڵەیەكەیەكی مرۆییەوە بووە.

تەلەڤزیۆنی فەرمی ئێران، لە زاری سەرچاوەیەكی باڵای سەربازییەوە ئاشكرای كرد، كەوتنەخوارەوەی فڕۆكە نەفەر ھەڵگرە ئۆكراینییەكە، بەھۆی پێكرانی بە مووشەكەوە بووە.

ھ.م