مەسرور بارزانی لەگەڵ سەرۆك وەزیرانی ئیتاڵیا كۆدەبێیتەوە

K24 - ھەولێر

ئەمڕۆ مەسرور بارزانی، سەرۆكی حكوومەتی ھەرێمی كوردستان لەگەڵ سەرۆك وەزیرانی ئیتاڵیا كۆدەبێتەوە و سبەش لەگەڵ پاپا و سەرۆك وەزیرانی ڤاتیكان كۆدەبێتەوە.

مەسرور بارزانی، سەرۆکی حکومەتی هەرێمی کوردستان دوای تەواوبوونی کارەکانی کۆنفرانسی ئاسایشی میونشن، بە سەرۆکایەتی شاندێکی حکومی ، گەیشتە رۆمای پایتەختی ئیتاڵیا و بڕیارە ئەمرۆ لەگەڵ جیوزێپێ کۆنتێ، سەرۆک وەزیرانی ئیتاڵیا كۆببێتەوە و گفتوگۆ دەربارەی هەماهەنگییەکانی رووبەڕووبوونەوەی تیرۆر دەکرێت.

 لە سەردانەکەدا شاندی حکوومەتی هەرێمی کوردستان کە پێکهاتوون لە دانا عەبدولکەریم وەزیری ئاوەدانکردنەوە و نیشتەجێکردن و ئانۆ جەوهەر وەزیری گواستنەوە و گەیاندن و پشتیوان سادق وەزیری ئەوقاف و کاروباری ئاینی و خالید شوانی وەزیری هەرێم ، دەرفەتەکانی وەبەرهێنان بۆ کۆمپانیا ئیتاڵییەکان تاوتوێ دەکەن.

ھەروەھا سەرۆكی حكومەتی ھەرێمی كوردستان ئەمڕۆ چەند چاوپێکەوتنێکی لەگەڵ دەزگاکانی راگەیاندنی ئیتاڵیا دەبێت و لەگەڵ چەند ناوەندێکی ئەکادیمی و سیاسیی ئەو وڵاتەش كۆدەبێتەوە.

پاشان سبەی چوارشەممە لە ڤاتیکان، سەرۆکی حکومەتی هەرێمی کوردستان لەگەڵ قەداسەتی پاپا و سەرۆك وەزیرانی ڤاتیكان و وەزیری بەرگری ئیتاڵیا كۆدەبێتەوە و باسی پابەندبوونی هەرێمی کوردستان بە پێکەوەژیانی ئایینی و هاندانی گفتوگۆی نێوان ئایینەکان دەکات.

سەرۆکی حکومەتی هەرێمی کوردستان لەبارەی سەردانەکەی بۆ ئیتالیا و ڤاتیکان رایگەیاند: "لەگەڵ قەداسەتی پاپا باسی گرنگی پێکەوە ژیانیی ئایینی لە هەرێمی کوردستان و رووبەڕووبوونەوەی تیرۆر دەکەین. شانازی دەکەین کە هەرێمی کوردستان هەوڵی زۆریداوە بۆ بەرەپێشبردنی گفتوگۆی نێوان ئایینەکان و رەخساندنی کەشێکی ئارام بۆ پەیڕەوانی تەواوی ئایینەکان لە هەرێمی کوردستان."