روونكردنەوەیەك لە کۆگای ناوەندی وەزارەتی تەندروستییەوە
رێكاری یاسایی دژی ئەو دەزگا راگەیاندنانە دەگرنەبەر
K24 - ھەولێر
کۆگای ناوەندی وەزارەتی تەندروستی رەتیدەكاتەوە، كە پێداویستییە تەندروستییەكانی وڵاتی چین، كە وەك ھاوكاری بۆ ھەرێمی كوردستان ھاتوون لە بازاڕەكان فرۆشرابێتەوە، راشیدەگەیەنێت، رێكاری یاسایی دژی ئەو دەزگا راگەیاندن و پەیجانە دەگرنەبەر كە ھەواڵەكەیان بڵاوكردووەتەوە.
د. دیار ئیبراھیم، بەڕێوەبەری کۆگای ناوەندی دەرمان و پێداویستی پزیشکی هەرێمی كوردستان بە كوردستان24ی راگەیاند: "دوا بەدوای بڵاو بوونەوەی هەواڵێك لە تۆرەكۆمەڵایەتییەكان كە گوایە "ئەو ماسكانەی لەلایەن وڵاتی چینەوە پێشكەشی وەزارەتی تەندروستی كراوە لە بازاردا فرۆشراوە"، ئێمە سەرلەبەری ئەو هەواڵە رەتدەكەینەوە و هیچ بنەمایەكی نییە".
گوتیشی: "وەزارەتی تەندروستی رێكاری یاسایی بەرامبەر هەر پەیج و دەزگایەكی راگەیاندن دەگرێتەبەر لەبەرامبەر چەواشەكاری و هەڵبەستنی هەواڵی بێبنەما، دوابەدوای لێكۆڵینەوەش لەلایەن لیژنەیەكی وەزارەتمانەوە روونبویەوە كە بازرگانێك بۆخۆی لە وڵاتی چینەوە ماسكی هاوردەكردووە و لە بازاڕەكانی هەرێم دەیفرۆشێت".