لوکا زیدان بانگهێشتی هەڵبژاردەی جەزائیر ده‌كرێت

لوکا زیدان کوڕی زینەدین زیدان راهێنەری فەڕەنسی یانەی ریال مەدریدی ئیسپانیا لەلایەن جەمال بلمازی راهێنەری هەڵبژاردەی جەزائیر گرنگی بە تواناکانی دەدرێت و دەگوترێت کە ئەو راهێنەرە بریاریداوە لە ئەگەری دەست پێکردنەوەی یارییەکان، ئەو یاریزانە لاوە بانگهێشتی هەڵبژاردەی جەزائیر بکات و بۆ ئەم مەبەستە پەیوەندی بەو یاریزانە کردووە و قسەیان لەگەڵ یەکتری کردووە.

لوکا زیدان له‌ یانه‌ی ریال مه‌درید پێگه‌یشتووه‌ و ئێستا گۆڵپارێزی یانەی رایسینگی ئیسپانیایە کە لە خولی پلەدووی ئەم وڵاتە یاریی دەکات و پێشتر لەگەڵ هەڵبژاردەی خوار 17 ساڵی فەڕەنسا بووەتە پاڵەوانی ئەوروپا، بەڵام تاوەکو ئێستا بانگهێشتی هەڵبژاردەی یەکەمی فەڕەنسا نەکراوە، بۆیە دەتوانێت یاریی بۆ هەڵبژاردەی جەزائیر بکات.

ئیسماعیل کە دەکاتە باپیری لوکا و باوکی زیدانی راهێنەری ریال مەدرید، بە رەگەز خەڵکی جەزائیرە و بەم هۆیەوە ئەو یاریزانە دەتوانێت یاریی بۆ ئەو هەڵبژاردەیە بکات.