گڕگرتنی پاڵاوگەیەك لە ھەولێر زیانی گیانی لێكەوتەوە

K24 - ھەولێر

رێناس عەلی، پەیامنێری كوردستان24 رایگەیاند: "بەھۆی رووداوێكی ئاگركەوتنەوە لە پاڵاوگەیەكی سوتەمەنی لەسەر رێگەی ھەولێر - مەخموور، كەسێك گیانی لەدەستدا و ژمارەیەكی دیكەش برینداربوون".

رائید سەركەوت كاڕەش، وتەبێژی بەرگری شارستانی ھەولێر بە كوردستان24ی گوت: "ئەمڕۆ ئاگر لە پاڵاوگەی سوتەمەنی كۆچەر كەوتەوە و تائێستا كۆنترۆڵ نەكراوە، بەداخەوە لە رووداوەكەدا كەسێك گیانی لەدەستداوە كە لە پاڵاوگەكە كاری كردووە".

لەبارەی ھۆكاری كەوتنەوەی ئاگرەكە گوتی: "لێكۆڵینەوە لە رووداوەكە دەستیپێكردووە، دوای كۆنترۆڵ كردنی ئاگرەكە زانیاری زیاتر دەخرێتەروو".

گوتیشی: "بۆ كۆنترۆڵكردنی ئاگرەكە زۆربەی تیمەكانی ئاگركوژێنەوەی بەرگری شارستانی ھەولێر گەیشتوونەتە شوێنی رووداوەكە".

وتەبێژی بەرگری شارستانی ھەولێر راشیگەیاند: "تیمەكانی ئاگركوژێنەوە رێگریان كردووە لەوەی كە ئاگرەكە مەترسی بۆسەر دەوروبەری پاڵاوگەكە ھەبێت".