هێرشی ئاسمانی ئەمەریکا و بەریتانیا بۆ سەر یەمەن بەردەوامە
مێدیای حووسییەکان ڕایانگەیاندووە "هێرشەکانی ئەمەریکا و بەریتانیا بۆ سەر حودەیدە لە یەمەن بەردەوامە."
هێرشەکە بۆ سەر پێگەی سەربازیی حووسییەکان لە نزیک زانکۆی حودەیدە لە شارۆچکەی حەول بووە.
هێزەکانی ئەمەریکا و بەریتانیا بۆردومانی چڕییان کردووەتە سەر پێگە سەربازییەکانی حووسییەکان لە یەمەن، هەروەها چەند شوێنێکی پارێزگای حودەیدە لە ڕۆژئاوای یەمەن.
لە مانگی ئەیلوولی ساڵی ڕابردوودا بەندەر و فڕۆکەخانەی حودەیدە لە ڕۆژئاوای یەمەن کەوتە بەر هێرشی توندی ئاسمانیی ئیسرائیل.
لە تشرینی دووەمی 2023وە حووسییەکان لە یەمەن لە دەریای سووردا هێرش دەکەنە سەر کەشتییە ئیسرائیلییەکان و ئەو کەشتییە بازرگانانەی بەرەو ئیسرائیل دەڕۆن، ئەمەش وەک پشتیوانییە لە غەززە و گەلی فەڵەستین.
لەبەرانبەریشدا، ئەمەریکا و هاوپەیمانەکانی هێزێکی سەربازییان پێک هێنا بۆ وەڵامدانەوەی هێرشەکانی حووسییەکان، فڕۆکەکانی ئەمەریکا و هاوپەیمانان چەندان هێرشیان کردووەتە سەر ناوچە جیاجیاکانی یەمەن، هەروەها سوپای ئەمەریکا بەجیا ناوبەناو ئەرکە سەربازییەکانی لە چوارچێوەی هێزەهاوپەیمانەکاندا جێبەجێ دەکات.
