هەڵمەتی گەڕاندنەوەی قوتابییە دابڕاوەکان بۆ خوێندن بەردەوامە

ئالان حەمە سەعید، وەزیری پەروەردەی حکوومەتی هەرێمی کوردستان بە کوردستان24ی ڕاگەیاند، هەڵمەتی گەڕاندنەوەی منداڵان بۆ قوتابخانە و بەردەوام بوون لە خوێندن بەردەوامە. 

وەزیری پەروەردە گوتیشی: هەڵمەتی گەڕاندنەوە بۆ بەرخوێندن لە هەرێمی کوردستان بەردەوامە، ئەم ساڵ پرۆسەکە بە هاوکاریی و هەماهەنگی ڕێکخراوەکان بە تایبەتی ڕێکخراوی یونیسێف دەستی پێکردووە و لە ماوەی ڕابردوودا 26 هەزار 385 منداڵمان گەڕاندووتەوە بەرخوێندن.

هەروەها ئاماژەیدا، ئەم پرۆسەیە گرنگییەکی ستراتیجی هەیە و بەردەوام دەبێت، بۆ ئەوەی نەهێڵین هیچ منداڵێک کە تەمەنی شیاوی خوێندن لە دەرەوەی ناوەندەکانی خوێندن بێت و لە خوێندن داببڕێت.

چوارشەممە، 25ی ئەیلوولی 2024، زەنگی دەستپێکردنی ساڵی نوێی خوێندنی 2024-2025 لە قوتابخانە حکوومەتی و ناحکوومەتییەکانی هەرێمی کوردستان بە بەشداریی زیاتر لە یەک ملیۆن و 800 هەزار قوتابیی لێدرا، کە زیاتر لە یەک ملیۆن و 720 هەزار قوتابیی قوتابخانە حکوومییەکان و زیاتر لە 132 هەزار قوتابیی قوتابخانە ناحکوومییەکانن.

هەر لەمبارەوە، سامان سیوەیلی گوتەبێژی وەزارەتی پەروەردە بۆ کوردستان24 گوتی: وەزارەتی پەروەردە لە کابینەی نۆیەمی حکوومەتی هەرێمی کوردستان لە 2020 ـەوە پرۆژەیەکی بە ناوی (Bag to Learning) واتە گەڕانەوە بۆ فێربوون یان گەڕانەوە بۆ خوێندن بە هاوکاری ڕێکخراوی یونیسێف و دەزگای خێرخوازی بارزانی جێبەجێکرد، لە پرۆسەکەدا ڕووپێوێکی فراوانی سەرتاسەری هەرێمی کوردستان بۆ دەست نیشانکردنی ئەو ناوچانەی منداڵانی تێدا لە خوێندن دابڕاون.

گوتیشی: لە چوارچێوەی پرۆژەکە لێکۆڵینەوە لە هۆکارەکانی دابڕانی منداڵەکان لە خوێندن کرا و دواتر بە گوێرەی پێویستییەکانیان هاوکاری کران بۆ ئەوەی بگەڕێنەوە بەرخوێندن، تاوەکوو ئیستاش پرۆسەکە بەردەوامە.

هەروا ڕایگەیاند: ڕێژەی دابڕان لە خوێندن بەراورد بە عێراق و هەندێک لە وڵاتانە زۆر کەمترە و ئەمەش دەرخەری ئەوەیە کە کۆمەڵگەی کوردستان کۆمەڵگەیەکی خوێندن دۆستە.