ناوەندی هاوبەشی هەماهەنگی قەیرانەکان هاوکاریی دەگەیەنێتە زیانلێکەوتووانی بارانەکەی کەرکووک

ناوەندی هاوبەشی هەماهەنگی قەیرانەکانی وەزارەتی ناوخۆی حکوومەتی هەرێمی کوردستان، هاوکاریی دەگەیێنێتە زیانلێکەوتووانی باران بارینەکەی کەرکووک.

دووشەممە 4ـی تشرینی دووەمی 2024، ناوەندی هاوبەشی هەماهەنگی قەیرانەکان،بە هاوکاری دەزگای خێرخوازی بارزانی، هاوکاریان گەیاندە هاووڵاتییانی زیانلێکەوتوووی باران بارینەکەی شاری کەرکووک لە  گەڕەکی شوراو.

بەڕێوەبەرایەتی کۆچ و کۆچبەران و وەڵامدانەوەی قەیرانەکانی کەرکوک دوای هەڵسەنگاندن بۆ ئەو ماڵ و کۆڵانانەی کە بە هۆی بارانەوە ئاو چۆتە ماڵەکانیان و زیانیان پێ گەیشتووە لەو گەڕەکە، کە ژمارەیان 15 ماڵە، هاوکاریی کران.

بەپێی ڕاگەیاندراوی ناوەندەکە، هاوکارییەکان بریتیبوون لە مۆکێت و دۆشەک و بەتانی، لەگەڵ سەبەتەی خۆراک و سەبەتەی پاککەرەوە و پێداویستیەکانی مناڵ کە بەسەر خێزانە زیانلێکەوتووەکان دابەشکران.

وەزارەتی ناوخۆی حکوومەتی هەرێمی کوردستان لەڕێگەی ناوەندی هاوبەشی هەماهەنگی قەیرانەکان تاوەکو ئێستا پێنج کۆگای وەڵامدانەوەی قەیران و کارەساتەکانی لەپارێزگاو ئیدارەسەربەخۆکانی هەرێمی کوردستان دروستکردووە بەمەبەستی بەهاناوەچوونی هاوڵاتیان و گەیاندنی کەلوپەلی پێویست لەبارودۆخە نەحوازراوەکان، بەسوود وەرگرتن و پشتیوانی وڵاتی ئەڵمانیا.