عەبدولزەهرە هنداوی بۆ کوردستان24: لە ڕۆژانی بەڕێوەچوونی سەرژمێری ڕێگە بە هاتووچۆی ڕاگەیاندنکاران دەدرێت
گوتەبێژی وەزارەتی پلاندانانی عێراق ئاماژه به‌وه ده‌كات، ڕۆژنامه‌نووسان له سه‌رجه‌م ده‌زگه مێدیاییه‌كان له ڕۆژانی 20 و 21ـی ئه‌م مانگه، سه‌رباری قه‌ده‌غه‌ی هاتووچۆ، ڕێگه‌پێدراو ده‌بن.
شه‌ممه، 9ـی تشرینی دووه‌می 2024، عه‌بدولزه‌هره هنداوی، گوتەبێژی وەزارەتی پلاندانانی عێراق تایبه‌ت به كوردستان24 ڕایگه‌یاند، ده‌سته‌ی ڕاگه‌یاندن و په‌یوه‌ندییه‌كان سێ ڕۆژ له‌مه‌وبه‌ر "لینك"ـێكی ئه‌لیكترۆنی ڕاگه‌یاندووه بۆ ئه‌وه‌ی ڕۆژنامه‌نووسان له سه‌رجه‌م ده‌زگه مێدیاییه‌كان پڕی بكه‌نه‌وه تاوه‌كوو له ڕۆژانی 20 و 21ـی ئه‌م مانگه، سه‌رباری قه‌ده‌غه‌ی هاتووچۆ، ڕێگه‌پێدراو بن و له ئه‌ركه‌كانیان به‌رده‌وام بن.
عه‌بدولزه‌هره هنداوی هه‌روه‌ها ئاماژه‌ی به‌وه كردووه، لینكه‌كه تا ئێسته كارایه و نیوه‌شه‌وی یه‌كشه‌ممه، 10ـی تشرینی دووه‌می 2024، داده‌خرێت و تا ئه‌و كاته ڕۆژنامه‌نووسان ده‌توانن داواكاریی بۆ وه‌رگرتنی باج و مۆڵه‌ت پێشكه‌ش بكه‌ن.
بڕیارە 20ـی تشرینی دووەمی 2024، سەرژمێریی گشتی لە عێراق و هەرێمی کوردستان ئەنجام بدرێت و یه‌كه‌م سه‌رژمێرییه له دوای 26 ساڵی ڕابردوودا.