ئەحمەد کەرکووکی: ئەم سەرژمێرییە دەروازەیەکە بۆ جێبەجێکردنی ماددەی 140

ئەندامێکی ئەنجوومەنی پارێزگای کەرکووک دەڵێت: "ئەگەر سەرژمێری لە عێراق گرنگ بێت، ئەوە لە ناوچەکانی سنووری ماددەی 140 بە کەرکووکیشەوە زۆر گرنگترە."

د. ئەحمەد کەرکووکی، ئەندامی ئەنجوومەنی پارێزگای کەرکووک بە کوردستان24ـی ڕاگەیاند، "لەهەموو وڵاتان سەرژمێری بایەخ و تایبەتمەندی خۆی هەیە، لە عێراقیش کە ئێستا سەرژمێری دەکرێت، بانگەشەی ئەوەی بۆ دەکرێت کە بۆ گەشەپێدان و ئابووری و کۆمەڵایەتیە."

ئاماژەی بەوەش کرد "ئەگەر سەرژمێری لە عێراق گرنگ بێت، ئەوە لە ناوچەکانی سنووری ماددەی 140 بە کەرکووکیشەوە زۆر گرنگترە، چونکە لەو ناوچانە شەڕی بوونی شوناس هەیە، هەروەها شەڕ لەسەر خاک و مانەوەی نەتەوە هەیە."

ئەندامەکەی ئەنجوومەنی پارێزگای کەرکووک گوتیشی:"هەرچەندە سەرژمێرییەکە بۆ بابەتی گەشەسەندنە، بەڵام ئێمە بەگرنگی دەزانین ئەوانەی خەڵکی کەرکووکن بەڵام لە هەولێر و سلێمانی نیشتەجێن، بگەڕێنەوە خۆیان ناونووس بکەن، چونکە ئێستا هیچ فەرمانبەرێک لە کەرکووک ئەگەر خۆی یان باب و باپیری سەرژمێری ساڵی 1957ـی نەبێت یەک پارچە زەوی وەرناگرێت."

 ئەحمەد کەرکووکی ڕاشیگەیاند "ئێمە لەسەرەتادا ترسمان لەو سەرژمێرییە هەبوو، بەڵام دوای کۆبوونەوەی هەردوو شاندی حکوومەتی هەرێمی کوردستان و حکوومەتی فیدرال و گەیاندنی نیگەرانییەکانی کورد بەبەغدا، ئێستا نیگەرانییەکان تۆزێک کاڵ بووەتەوە، تەنانەت ئەو سەرژمێرییە دەروازەیەکە بۆ جێبەجێکردنی ماددەی 140."

باسی لەوەش کرد "لە چەند ساڵی داهاتوودا، ئەو سەرژمێرییە بۆ دامەزراندن و دابەشکردنی زەویش بەکار دەهێنرێت، بۆیە کە پێشتر ناوی سەرژمێریی 1957 دەهێنرا، لەمەودوا ناوی سەرژمێری 2024 دەهینرێت، لەبەر ئەوە ئێمە بانگەوازمان کردووە کە خەڵکی خۆمان بێن و خۆیان ناونووس بکەن."

دەشڵێت: "هەموو عەرەبە هاوردەکانی شاری کەرکووک، دەگەڕێندرێنەوە بۆ زێدی خۆیان، ئەگەر سەرژمێریش لەکەرکووک بکەن لەسەر شاری خۆیان هەژماردەکرێن نەک لەسەر کەرکووک، هەروەها بۆ ئەو سەرژمێرییە، سەرژمێری ساڵی 1957 کراوەتە بنەما".