هاتوچۆ لەپردی گەلی عەلی بەگ ئاسایی بووە

دوای هەشت ڕۆژ کارکردن لە پردی گەلی عەلی بەگ، ئەمڕۆ یەکشەممە دوای چاککردنەوە و نۆژەنکردنەوەی پردەکە، ڕێگەی هاتوچۆ بەڕووی شۆفێراندا کرایەوە.

هەڵگورد شێخ نەجیب، سەرپەرشتیاری ئیدارەی سەربەخۆی سۆران بە کوردستان 24ـی ڕاگەیاند، پرۆسەی نۆژەنکردنەوەی پردی گەلی عەلی بەگ، زووتر لەو وادەی بۆمان دیاری کردبوو، تەواوکرا و لەبەردەم ڕێبواران و جولەی بازرگانیدا کرایەوە.

گوتیشی: پلانێکمان لەبەر دەستە لە ئایندەیەکی نزیکدا، ڕێگای گەلی بکرێتە دووساید و کار لەسەر تونێلی بەنی هەریر و کۆڕەک دەکەین.

لە ماوەی ئەو هەفتەیەدا لە کاتی نۆژەنکردنەوەی پردی گەلی عەلی بەگ، شۆفێران هاتوچۆیان بە ڕێگای سۆران - بێخاڵ دەکرد، بەڵام شۆفێران توشی ئاستەنگی زۆر دەبوونەوە، بە هۆی ئەو قەرەباڵغییە لە ڕێگەکەدا دروست دەبوو.

لە 27ـی کانوونی یەکەمی 2024، بەهۆی خۆکێشانی بارهەڵگرێک بە پردی گەلی عەلی بەگ، پردەکە تێکشکاو و زیانی بەرکەوت، بەم هۆیەوە هەشت ڕۆژ هاتوچۆ لەم ڕێگە داخرا و لە کاتێکدایە ڕێگەیەکی نێودەوڵەتییە.