هۆشیار زێباری: هێرشەکەی تورکیا زەنگێکی مەترسیدارە

K24- هەولێر:

هۆشیار زێباری، وەزیری پێشووی دەرەوەی عێراق و ئەندامی مەکتەبی سیاسی پارتی دیموکراتی کوردستان، هێرشی تورکیا بە مەترسییەکی زۆر جددی ناو دەبات.

زێباری لە تویتێکد لەبارەی بەزاندنی سنوور و هاتنە ناوەوەی سوپای تورکیا بۆ هەرێمی کوردستان نووسیویەتی، پەلاماری تورکیا بۆ هەرێمی کوردستان و ناوچەی زاخۆ پێشهاتێکی جیۆسیاسی زۆر جددیە. دەشڵێت، چڕی هێرشەکان زەنگێکی مەترسیدارە.

ئەو ئەندامەی مەکتەبی سیاسی ئاماژەی بەوەشکردووە، داوای سەرکردەکانی تورک بۆ زیندووکردنەوەی داواکردنی پارێزگای موسڵ لە لایەن تورکیاوە زیاتر لە هەموو پێشهاتەکانی دیکە مایەی نیگەرانییە.

سوپای تورکیا چەند ئۆپەراسیۆنێکی لە ژێر ناوی “کۆتایی هێنان بە مەترسییەکانی پەکەکە لە عێراق” لە هەرێمی کوردستان دەستپێکردووە و هێزێکی زۆری بۆ سنووری پارێزگای دهۆک ناردووە.

هەروەها بەهۆی بۆردومانەکانی فڕۆکەکانی تورکیا، چەند هاووڵاتییەکی مەدەنی گیانیان لەدەستداوە و لە دواین هێرشیش، لە کونە ماسی سەر بە شارباژێڕی سلێمانی، زیانی گیانی و ماددی گەیاندە هاووڵاتیان.

The recent #Turkish military incursion into #Iraqikurdistan in #Zako region is a very serious geopolitical development. The intensity of the attack is alarming. Calls by Turkish leaders to revive historical claims of #Mousal province is even far more disturbing.

— Hoshyar Zebari (@HoshyarZebari) June 26, 2020