پرسی فەڵەستین، وڵاتانی عەرەبی دێنێتە دەنگ
وڵاتانی عەرەبی لە قاهیرە، دۆخی غەززە و "پێشهاتە نوێ و مەترسیدارەکانی تایبەت بە پرسی فەڵەستین" تاوتوێ دەکەن.
یەکشەممە، 09-02-2025، وەزارەتی دەرەوەی میسر لە ڕاگەیەندراوێکدا ئاماژەی بەوە دا "ڕۆژی پێنجشەممە، 27-02-2025، لووتکەیەکی بەپەلەی عەرەبی لە قاهیرە بۆ تاوتوێکردنی پێشهاتە نوێ و مەترسیدارەکانی تایبەت بە پرسی فەڵەستین، بەڕێوە دەچێت."
وەزارەتەی دەرەوەی میسر ئەوەشی خستووەتە ڕوو، بڕیاری ڕێکخستنی لووتکەکە لە قاهیرە، لەسەر داوای دەسەڵاتدارێتیی فەڵەستین و بە ڕاوێژ و هەماهەنگی لەگەڵ کۆمکار و وڵاتانی عەرەبی دراوە.
بەڕێوەچوونی ئەم لووتکەیە لە کاتێکدایە، لە چەند ڕۆژی ڕابردوودا، دۆناڵد ترەمپ، سەرۆکی ئەمەریکا ڕایگەیاند "کۆنترۆڵی کەرتی غەززە دەکەن و هاووڵاتییانی بۆ ئوردن و میسر دەگوازنەوە، تا ئەو کاتەی ئاوەدانی کەرتەکە دەکەنەوە؛ ئەمەش لەسەر ئاستی وڵاتانی عەرەبی و ناوچەکە ناڕەزایەتیی لێ کەوتەوە."
بەم دواییانەش، زۆرینەی وڵاتانی عەرەبی سەرکۆنەی لێدوانێکی بنیامین ناتانیاهۆ، سەرۆک وەزیرانی ئیسرائیلیان کرد کە گوتبووی: سعوودییە خاکێکی زۆری هەیە، با دەوڵەتێکی فەڵەستینی لەسەر خاکەکەی دروست بکات.
ڕۆژی یەکشەممە 19ـی کانوونی دووەمی 2025، ئاگربەستەکەی غەززە بە نێوەندگیریی میسر و قەتەر و ئەمەریکا، کەوتە بواری جێبەجێکردنەوە، قۆناغی یەکەمی ئاگربەستەکە ماوەکەی 42 ڕۆژ دەبێت، دانوستانەکان بەردەوام دەبن بۆ دەستپێکردنی قۆناغی دووەم و دواتر قۆناغی سێیەم.
لە چوارچێوەی ڕێککەوتنی ئاگربەست، تاوەکوو ئێستە 21 بارمتەی ئیسرائیلی و بیانیی ژێر دەستی حەماس و 783 زیندانی فەڵەستینی لەنێو زیندانەکانی ئیسرائیلدا ئازاد کراون. هاوکات شەڕ ڕاگیراوە و سەدان بارهەڵگری هاوکاریی مرۆیی گەیەنراونەتەوە کەرتەکە.