کۆبوونەوەی سەرۆک بارزانی و شاندی دەم پارتی کۆتایی هات

نەورەس عەبدوڵلا، پەیامنێری کوردستان24 ڕایگەیاند، کۆبوونەوەی سەرۆک بارزانی و شاندی دەم پارتی کۆتایی هات. 

نزیکەی کاتژمێر 10:00ـی بەیانیی ئەمڕۆ یەکشەممە، 16-02-2025، شاندی دەم پارتی بۆ ئیمرالی گەیشتە بارەگای بارزانی و لەبارەی پرۆسەی نوێی ئاشتی لە تورکیا و باکووری کوردستان؛ لەگەڵ سەرۆک بارزانی کۆبوونەوە. 

شاندەکەی دەم پارتی کە لە پەروین بوڵدان و سرری سورەییا ئۆندەر پێک دێت؛ دوێنێ شەممە، 15-02-2025، گەیشتە هەولێر و لەگەڵ بەرپرسانی هەرێمی کوردستان ژمارەیەک کۆبوونەوەیان دەبێت. 

چاوەڕێ دەکرێت دوای گەڕانەوەیان بۆ باکووری کوردستان، شاندەکەی دەم پارتی کە دوو جار لەگەڵ عەبدوڵلا ئۆجەلان، ڕێبەری زیندانیکراوی پارتی کرێکارانی کوردستان کۆبووەتەوە؛ بۆ جاری سێیەم لەبارەی پرۆسەی نوێی ئاشتی لە تورکیا و باکووری کوردستان، لەگەڵ ئۆجەلان کۆ ببنەوە. 

"بۆچوونی سەرۆک بارزانی لەبارەی پرۆسەی ئاشتی زۆر گرنگە"

ڕۆژی هەینی، 14-02-2025، پەروین بوڵدان، ئەندامی شاندی دەم پارتی بۆ ئیمراڵی، لەبارەی سەردانەکەیان بۆ هەرێمی کوردستان، بە کوردستان24ـی گوت: "لە کۆبوونەوەکاندا زانیاری لەبارەی پرۆسەی نوێی ئاشتی تاوتوێ دەکەین، لە دوای ئەوەی دوو جار لەگەڵ ئۆجەلان گفتوگۆمان کردووە و پێی ڕاگەیاندووین، کە کۆبوونەوەیان لەگەڵ سەرۆک بارزانی و وەرگرتنی بۆچوونەکانیان لەبارەی پرۆسەکە زۆر گرنگە."

ئەو ئەندامەی شاندی دەم پارتی بۆ زیندانی ئیمراڵی، باسی لەوەش کرد "لە کۆبوونەوەمان لەگەڵ سەرۆک بارزانی بۆچوون و بیرکردنەوە و پێشنازە گشتگیرەکانی لەبارەی پرۆسەکە بەهەند وەردەگرین و دواتر بە ئۆجەلانی ڕادەگەیەنین."

پاش دوو جار کۆبوونەی شاندی دەم پارتی لەگەڵ ئۆجەلان، پەروین بوڵدان، لەبارەی سازدانی کۆبوونەوەی سێیەم بۆ کوردستان24 ئاشکرای کرد "تا ئێستا هیچ وادەیەک بۆ سەردانی زیندانی ئیمراڵی دانەنراوە و چاوەڕێ دەکرێت بانگەوازێک لەلایەن ئۆجەلانەوە هەبێت، بەڵام هیچ وادەیەک بۆ ئەم بانگەوازەش دیاری نەکراوە."

پەیامە مێژووییەکەی ئۆجەلان و هەڵوێستی پەکەکە

 چوارشەممە، 12-02-2025، تولای هاتیمۆگولاری، هاوسەرۆکی دەم پارتی ڕایگەیاند "لەم مانگەدا ئۆجەلان 'پەیامە مێژووییەکە'ی لەبارەی پرۆسەی نوێی ئاشتی لە تورکیا و باکووری کوردستان بڵاو دەکاتەوە." باسی لەوەش کرد "ئۆجەلان، لە پەیامەکەیدا جەخت لە چارەکردنی پرسی کورد لە ڕێگەی ئاشتی و دیالۆگ دەکاتەوە، چونکە چەندان ساڵە شەڕ و ململانێکان پرسەکەیان چارە نەکردووە."

هەروەها پارتی کرێکارانی کوردستان (پەکەکە) لە ڕاگەیەندراوێکدا باسی لەوە کردووە، دوای 26 ساڵ لە دەستگیرکردنی، ئەگەر هیچ کۆسپێک نەخرێتە بەردەمی، قۆناغێکی نوێ لەلایەن عەبدوڵلا ئۆجەلانەوە دەست پێ دەکات کە تورکیا، تەنانەت ڕۆژهەڵاتی ناوەڕاست و تەواوی جیهانیش دەگۆڕێت. 

پەکەکە ڕاشیگەیاندووە "ئۆجەلان و کورد، تورکیا دابەش ناکەن، بەڵکو کار بۆ دیموکراسیبوونی دەکەن."