باڕ و یانەکانی شەوانە بوونەتە سەرچاوەی دووبارە بڵاوبوونەوەی کۆرۆنا لە ئیسپانیا
حکومەتی ئیسپانیا کۆبوونەوەی زیاتر لە 10 کەسی لە یەک شوێندا قەدەغەکردووە
K24 - هەولێر
تۆماركردنی چەندین حاڵەتی نوێی تووشبوون بە كۆرۆنا لە ئیسپانیا، ھۆكارەكەی دەگەڕێتەوە بۆ کۆبوونەوە لە یانەکانی شەوانە، ئەمە گوتەی بەرپرسانی تەندروستیی ئیسپانیایە.
بەمەبەستی کەمکردنەوە و رێگریکردن لە بڵاوبوونەوەی زیاتری ڤایرۆسی کۆرۆنا، لە شاری بارسێلۆنا و چەندین ناوچەی دیكەی ئیسپانیا، دووبارە هەموو شانۆ و یانە شەوانەکان داخران و کۆنسێرت و ئاهەنگەکان هەڵوەشێنرانەوە.
ھاوڵاتییەکی شارەکە دەڵێ "بێ گومان، لەگەڵ ئەوەدام رێكارەكان تووندتر بكرێن، دۆخەكە مەترسیدارە و ئەگەر خەڵكی پابەندی رێنماییەكان نەبن، دۆخەكە لەوەی ھەیە خراپتر دەبێت".
هەفتەیەك لەمەوبەر لە بارسێلۆنا یانە شەوانەکان و شانۆکان کرانەوە، بەڵام لە بڕیارێکی نوێدا، بەرپرسانی تەندروستی بڕیاریاندا ئەو شوێنانە لە سەرانسەری کەتەلۆنیا دابخرێنەوە، ئەوەش کاریگەری لەسەر حەوت ملیۆن و 500 هەزار دانیشتوو و گەشتیاری ئەو ناوچەیە دەبێت.
ئەگەرچی حکومەتی ئیسپانیا کۆبوونەوەی زیاتر لە 10 کەسی لە یەک شوێندا قەدەغەکردووە، بەڵام لەگەڵ ئەوەشدا شەوانە خەڵک بەکۆمەڵ روودەكەنە باڕەکان و یانەکانی شەوانە، بۆیە لە چەندین ناوچە و هەرێمی ئیسپانیا، دیسکۆ و یانەکانی شەوانە داخرانەوە یان ئامادەکاری بۆ دووبارە داخستنەوەیان دەکرێت.
هـ.ر.
