سیاسی

تۆپخانەکانی تورکیا دەڤەری برادۆستیان تۆپبارانکرد

دەڤەرەکە بووەتە مەیدانی جەنگ

باشووری کوردستان

K24- هەولێر:
پێش نیوەڕۆی ئەمڕۆ دووشەممە جارێکی دیکە تۆپخانەکانی تورکیا تۆپبارانی سنوری هەردوو گوندی قۆڕنان و مێرگەڕەشیان لەدەڤەری برادۆست لەسنوری شارەدێی سیدەکان کرد.

ئیحسان چەلەبی بەڕێوەبەری شارەدێی سیدەکان بەکوردستان24ی راگەیاند، کاتژمێر 10:30ی پێش نیوەڕۆ جارێکی دیکە تۆپخانەکانی تورکیا تۆپبارانی ئەو دەڤەرەیان کرد.

راشیگەیاند، هەرچەند زیانی گیانی بەدواوە نەبوو لەڕیزی هاووڵاتیانی سیڤیل، بەڵام بەهۆی تۆپبارانەکە ئاگرکەوتووەتەوە و تا ئێستا رووبەرێکی زۆری دارستان و پاوانی ناوچەکە سووتاوە و ئاگرەکەش بەردەوامە.

ئاماژەی بەوەشکرد، پەکەکە و تورکیا دەڤەرەکەیان کردۆتە مەیدانی شەڕو یەکلاکردنەوەی کێشەی نێوانیان کە خەڵکی سیڤیل باجەکەی داوە و دەشیدات، روونیشکردەوە، تا ئێستا لەکۆی 264 گوندی سیدەکان 118 گوندیان ئاوەداننەکراونەتەوە یان چۆڵکراون و 20 گوندی دیکەش مەترسی چۆڵکردنیان لەسەرە.

تەیفور محەممەد ,