ئەو شۆفێرەی بە بارھەڵگر خۆی بە گەنجێکدا کێشا و هەڵات، دەستگیرکرا
گەنجەکە بەهۆی رووداوەکە گیانی لەدەستدابوو
K24 - ھەولێر
ئەو شۆفێرەی بە بارهەڵگر خۆی بە کەسێکدا کێشا و بووە هۆی گیانلەدەستدانی پاشان هەڵات، دۆزرایەوە و لەلایەن ئاسایشی هەولێر دەستگیرکرا.
بەڕێوەبەرایەتی ئاسایشی ھەولێر لە راگەیەندراوێكدا ئاشكرای كرد، كەسێكیان دەستگیركردووە چەند رۆژێک لەمەوبەر بە بارھەڵگر خۆی بە گەنجێکدا کێشاوە كە ماتۆڕسكیلی پێبووە و گیانی لەدەستداوە.
دەقی راگەیاندراوی ئاسایشی هەولێر:
لە رێککەوتی ٢٠-٨-٢٠٢٠ رووداوێکی هاتووچۆ لەنێوان ماتۆڕسکیلێک و بارهەڵگرێک لە شاری هەولێر لە شەقامی مەخموور روویدا. رووداوەکە بووە هۆی گیانلەدەستدانی شۆفێری ماتۆڕسکیلەکە بە ناوی ( مەهدی سعدی حەسن سەعدی) و بارهەڵگرەکەش نەوەستابوو و رایکردبوو.
دوای رووداوەکە تیمەکانی لێکۆڵینەوە و بەدواداچوونی بەڕێوەبەرایەتیمان توانیان بارهەڵگرەکە و تاوانباری راکردوو بە ناوی (ک.م.أ.) بدۆزنەوە و ئەمڕۆ دەستگیری بکەن.
لەسەر فەرمانی دادوەری لێکۆڵینەوە، رێکارە یاساییەکانی بەرامبەر وەردەگیرێت.
راگەیاندنی ئاسایشی هەولێر