ڕووبەری بە بیابانبوونی عێراق لە 30% بۆ 61% لە فراوانبووندایە

پسپۆرێکی ژینگە و کەشوهەوا ڕەخنە لە سیستەمی بەڕێوەبردنی ئاو لە عێراق دەگرێت و دەڵێت، سەرەڕای گۆڕانی کەشوهەوا، بەڵام حکوومەتی عێراق خۆی بەرپرسیارە لەم قەیرانە کەمئاوی و وشکەساڵییەی بەرۆکی وڵاتەکەی گرتووە.

هەینی 25ـی تەممووزی 2025، ساڵح نەجیب، پسپۆری ژینگە و کەشوهەوا لەبارەی وشکەساڵی و قەیرانی ئاو لە عێراق بە کوردستان24ـی گوت: سەرەڕای ڕووداوە سروشتییەکان و گۆڕانی کەشوهەوا، بەڵام عێراق پلانێکی دروستی بۆ بەڕێوەبردنی ئاو نییە.

ئاماژەشی دا، داهاتی ئاوی عێراق تەنیا 9%ـیە، واتە 91%ـی ئاوەکە لە دەرەوە دێت، بە شێوەیەک  80%ـی لە تورکیا و 7%ـی لە ئێران و 4%ـی لە سووریا دێت.

ئەو پسپۆرە هۆکارەکانی قەیرانی ئاوی لە عێراق خستە ڕوو و گوتی:کێشەی گۆڕانی کەشوهەوا ساڵ بۆ ساڵ خراپتر دەبێت و لێکەوتەکانی گەورەتر دەبن، بەمەش ڕێژەی بیابان لە عێراق لە 30% بۆ 61% فراوان بووە، هاوکات بەهۆی ئەوەی وڵاتەکە سیستەمێکی تۆکمەی بۆ بەڕێوەبردنی ئاوی نییە، ڕێژەی دانیشتووانیش لە زیادبوون دایە و کەمی ژمارەی بەنداوەکان بووەتە هۆی ئەوەی دۆخێکی خراپی وشکەساڵی لە وڵاتەکە ڕوو بدات.

باسی لەوەش کرد، عێراق سیاسەتێکی دروستی بۆ ئاو نییە، ناکرێت لە مێژووی دروستبوونی تاوەکوو ئێستا تەنیا 22 بەنداو لە وڵاتەکە هەبێت، لە کاتێکدا تورکیا نزیکەی هەزار و 250 بەنداو و ئێران 647 بەنداوی هەیە.

ساڵح نەجیب ئاماژەشی دا، ڕێژەی سەوزایی لە عێراق بۆ ئاستێکی بەرچاو کەم بوو، هاوکات بەهۆی وشکەساڵییەوە ملیۆنان کەس ناوچەکانیان بەجێ هێشتووە و هەزاران عەرەب هاتوونەتە هەرێمی کوردستان.