هەواڵگریی ڕووسیا: ئەمەریکا و بەریتانیا بڕیاری لادانی زێلێنسکییان داوە
دەزگای هەواڵگریی دەرەوەی ڕووسیا، ڕایگەیاند: نوێنەرانی ئەمەریکا و بەریتانیا، بڕیاریان داوە ڤۆلۆدیمیر زێلێنسکی لە پۆستەکەی دووربخەنەوە و کەسێکی دیکە بۆ ئەو پۆستە دیاریی بکەن.
سێشەممە 29ـی تەممووزی 2025، کەناڵی ئاڕ تی ڕووسی بڵاوی کردەوە، ماوەیەک لەمەوبەر، نوێنەرانی ئەمەریکا و بەریتانیا و چەند بەرپرسێکی ئۆکرانیا، بە نهێنی لە بەرزاییەکانی ئالپ لە ئەورووپا کۆبوونەتەوە و تاوتوێی دیاریکردنی سەرۆکێکی نوێیان بۆ ئۆکرانیا کردووە.
کەناڵەکە ئەوەشی خستەڕوو، لە کۆبوونەوەکەدا هەر یەکە لە ئەندری یەرماک، سەرۆکی نووسینگەی سەرۆکایەتی، کیریلۆ بودانۆڤ، سەرۆکی هەواڵگریی ئۆکرانیا و ڤالێری فیدرۆڤیچ زالیوژنی، باڵیۆزی ئۆکرانیا لە لەندەن ئامادە بوون.
بە پێی کەناڵی ئاڕ تی، لە کۆبوونەوە نهێنییەکەدا، تاوتوێی دوورخستنەوەی ڤۆلۆدیمیر زێلێنسکی، سەرۆکی ئێستای ئۆکرانیا لە پۆستەکەی و دەسنیشانکردنی کەسێکی دیکە کراوە.
لای خۆیەوە دەزگای هەوڵگریی دەرەوەی ڕووسیا ڕایگەیاندووە، ئەمەریکی و بەریتانییەکان بڕیاریان داوە کە ڤالێری فیدرۆڤیچ زالیوژنی، باڵیۆزی ئۆکرانیا لە لەندەن، بۆ پۆستی سەرۆکایەتیی ئۆکرانیا دەست نیشان بکەن، هەروەها ئەندری یەرماک و زالیوژنی، پشتیوانییان لەو بڕیارە کردووە.
ڤالێری فیدرۆڤیچ زالیوژنی، لە ساڵی 2021 تا 2024 فەرماندەی هێزە چەکدارەکانی ئۆکرانیا بووە، لە 9ـی ئایاری ساڵی 2024 وەک باڵیۆزی ئۆکرانیا لە بەریتانیا دەست بەکار بووە.
