حکوومەتی باشووری سودان وەرگرتنی فەڵەستینییەکانی غەززە ڕەتدەکاتەوە
حکوومەتی باشووری سودان ڕۆژی شەممە ئەو هەواڵانەی ڕەتکردەوە کە باس لە وەرگرتنی فەڵەستینییەکان دەکەن لە کەرتی غەززەوە و بە "ڕاپۆرتی ناڕاست و نافەرمی" ناوی بردن. وەزارەتی دەرەوەی باشووری سودان لە بەیاننامەیەکدا ڕایگەیاند کە ئەم بانگەشانە "بێ بنەمان و ڕەنگدانەوەی هەڵوێست یان سیاسەتی فەرمی حکوومەتی کۆماری باشووری سودان نین".
لێدوانە فەرمییەکان جەخت لەسەر ڕەتکردنەوەی ئاوارەبوونی زۆرەملێ دەکەنەوە. ستیڤن لوال نگۆر، ئەندامی لیژنەی پەیوەندییەکانی دەرەوە لە پەرلەمانی نیشتمانی، ڕاگەیاند کە ئەم ڕاپۆرتانە نافەرمی و بێباوەڕن. هەروەها، عەتم گەرەنگ، ئەندامێکی دیکەی پەرلەمان، دووپاتیکردەوە کە حکوومەت ئەم ڕاپۆرتانەی ڕەتکردووەتەوە و وڵاتەکەی دژی ئاوارەبوونی زۆرەملێیە.
سەرەڕای ڕەتکردنەوەی فەرمی، چەندان دەزگای میدیایی نێودەوڵەتی زانیاری جیاوازیان بڵاوکردووەتەوە. ئاژانسی ڕۆیتەرز لە زاری سێ سەرچاوەی ئاگادارەوە بڵاویکردەوە کە باشووری سودان و ئیسرائیل لە گفتوگۆدان سەبارەت بە ڕێککەوتنێک بۆ گواستنەوەی فەڵەستینییەکان لە غەززە، هەرچەندە تا ئێستا هیچ ڕێککەوتنێک نەکراوە.
لەلایەکی دیکەوە، ڕۆژنامەی "تەلەگراف"ی بەریتانی ڕاپۆرتێکی بڵاوکردەوە و تێیدا هاتووە کە حکوومەتی باشووری سودان ڕەزامەندی دەربڕیوە لەسەر وەرگرتنی فەڵەستینییەکان. بەگوێرەی ڕۆژنامەکە، بەرپرسێک لە وەزارەتی دەرەوەی جوبا وتوویەتی کە ئەم ڕەزامەندییە لە چوارچێوەی ڕێککەوتنێکدایە کە هەڵگرتنی سزاکانی ئەمەریکا لەسەر باشووری سودان و وەبەرهێنانی ئیسرائیل لە کەرتەکانی تەندروستیی و پەروەردە لەخۆدەگرێت.
حکوومەتی باشووری سودان سەردانی شارن هاسکێلی، جێگری وەزیری دەرەوەی ئیسرائیل، بۆ جوبا پشتڕاست کردەوە، بەڵام جەختی لەوە کردەوە کە سەردانەکە تایبەت بووە بە پتەوکردنی پەیوەندییە دووقۆڵییەکان و واژۆکردنی یاداشتێکی لێکتێگەیشتن بۆ پەرەپێدانی هەوڵەکانی گەشەپێدانی هاوبەش، و هیچ پەیوەندییەکی بە پرسی گواستنەوەی فەڵەستینییەکانەوە نەبووە. بەرپرسانی باشووری سودان ئاماژەیان بەوەدا کە پەیوەندییەکانیان لەگەڵ ئەمەریکا و ئیسرائیل ستراتیژییە و لەسەر بنەمای بەرژەوەندی و ڕێزی هاوبەشە.
بنیامین ناتانیاهۆ، سەرۆک وەزیرانی ئیسرائیل، و چەند وەزیرێکی دیکەی حکوومەتەکەی، چەندان جار باسیان لەوە کردووە کە کار لەسەر "کۆچی خۆبەخشانە"ی دانیشتووانی غەززە دەکەن. هەروەها دۆناڵد ترەمپ، سەرۆکی پێشووی ئەمەریکا، پێشتر ئاماژەی بە ئەگەری گواستنەوەی خەڵکی غەززە بۆ وڵاتانی دیکە کردبوو.
ئەم پێشنیازانە ڕووبەڕووی ڕەتکردنەوەیەکی بەرفراوانی عەرەبی و نێودەوڵەتی بوونەتەوە و وەک "پلانی ئاوارەکردنی سیستماتیک" ڕەخنەیان لێگیراوە. وڵاتانی عەرەبی بەردەوام جەخت لەسەر پابەندبوونیان بە "مافی گەڕانەوە"ی هەموو پەنابەرانی فەڵەستینی بۆ زێدی خۆیان دەکەنەوە.