ئوسترالیا, ئێران بە هێرشکردنە سەر جووەکان تۆمەتبار دەکات

ئەمڕۆ چوارشەممە، 27ـی ئابی 2025، وەزیری ناوخۆی ئوسترالیا ڕایگەیاند، دەستێوەردانەکانی ئیسرائیل نەبووەتە هۆی دەرکردنی باڵیۆزی ئێران، هاوکات تارانی بە ئەنجامدانی لانیکەم دوو هێرشی دژە جوو لە گەورەترین شارەکانی وڵاتەکە، سیدنی و مێلبۆرن، تۆمەتبار کرد.

لە وەڵامێکدا بۆ پرسیارەکانی پەیوەندیدار بە بانگەشەکانی ئیسرائیل کە گوایە ڕۆڵیان هەبووە لە بڕیاری ئوسترالیا بۆ دەرکردنی ئەحمەد سادقی، باڵیۆزی ئێران، وەزیری ناوخۆی ئوسترالیا، تۆنی بورک، بە ڕادیۆی ABC ڕاگەیاند: "ئەوە بە تەواوی بێمانایە." بورک جەختی لەوە کردەوە، یەکسەر دوای وەرگرتنی زانیارییەکان، دەستیان بە کارکردن کردووە بۆ وەڵامدانەوە.

ئەنتۆنی ئەلبانیز، سەرۆک وەزیرانی ئوسترالیا، پێشتر ئێرانی تۆمەتبار کردبوو بەوەی لە پشت ئاگرکەوتنەوەی مانگی تشرینی یەکەمی 2014 بووە، کە کافێیەک لە گەڕەکی بۆندی لە سیدنی کردە ئامانج. هەروەها، ئێران بە هێرشێکی سووتاندنی کەنیسەی "ئاداس ئیسرائیل" لە مێلبۆرن لە مانگی کانوونی یەکەمی هەمان ساڵدا تۆمەتبار کرد. هیچ کام لەم دوو هێرشە زیانی گیانیان لێ نەکەوتەوە.

ئوسترالیا، سادقی و سێ دیپلۆماتکاری دیکەی ئێرانی بە "کەسایەتییەکی پەسەند نەکراو" ناساند و حەوت ڕۆژیان پێدرا بۆ جێهێشتنی وڵاتەکە. لە وەڵامدا، ئوسترالیا باڵیۆزی خۆی لە ئێران کشاندەوە و ئۆپەراسیۆنەکانی نوێنەرایەتییەکەی لە تاران، لە ساڵی 1968وە، بەردەوام بوو، ڕاگرت.

لەلایەن خۆیەوە، عەباس عراقچی، وەزیری دەرەوەی ئێران، ئەلبانیزی بە "سیاسەتمەدارێکی لاواز" وەسف کرد و لە هەژماری تایبەتی خۆی لە تۆڕی کۆمەڵایەتی ئێکس نووسیویەتی: تۆمەتەکانی ئوسترالیا "نا لۆژیکی"ن.

عراقچی لە پۆستەکەیدا دەڵێت: "ئێران باجی هاوپشتی گەلی ئوسترالیا لەگەڵ فەڵەستین دەدات و نەدەبوو کانبێرا خۆی لەگەڵ ڕژێمێک کە تاوانبارانی جەنگ سەرۆکایەتی دەکات، هاوتەریب بکات،" بە ئاماژەدان بە حکوومەتی ئیسرائیل.

تاران سوێندی خوارد، بە شێوەی ماددی وەڵامی دەرکردنی باڵیۆزی ئێران لە ئوسترالیا بداتەوە.