بەوێنە... تێکدانی پێنج شوێنی حەوانەوەی چەکدارانی داعش لە کەرکووک

 K24 - هەولێر

پۆلیسی فیدراڵی ئۆپەراسیۆنێکی بەدواداگەڕان و پاککردنەوەی لە زنجیرە چیاکانی دۆڵان لە پارێزگای کەرکووک ئەنجامدا و چەند شوێنێکی حەوانەوەی چەکدارانی داعشی دۆزییەوە و تێکدا.

پۆلیسی فیدراڵی لە راگەیەندراوێکدا دوێنێ (شەممە، 14-11-2020) ئاشکرای کردووە، یەکەی پێنجی پۆلیسی فیدراڵی ئۆپەراسیۆنێکی ئەمنی بۆ پاککردنەوەی زنجیرە چیاکانی دۆڵان لە قەزای داقووقی پارێزگای کەرکووک ئەنجامدا.

بەپێی راگەیەندراوەکە، ئۆپەراسیۆنەکە بە هەماهەنگی لەگەڵ لیوای 20، دەستەی ئەندازەی مەیدان و هەواڵگری بووە، هەروەها فڕۆکەی بێفڕۆکەوانیشی تێدا بەکارهاتووە.

لە ئەنجامی ئۆپەراسیۆنەکەدا وەکو لە راگەیەندراوەکە ئاشکرا کراوە و چەند وێنەیەکیشی لەلایەن پۆلیسی فیدراڵییەوە بڵاوکراوەتەوە؛ سێ شوێنی حەوانەی چەکدارانی داعش لەگەڵ دوو عەرەبانەی کشتووکاڵی کە پێخەف و شوێنی حەوانەی چەکدارانی داعشیان تێدا بووە، دۆزراونەتەوە، دواتر لەنێوبراون.

هـ.ر.