وەزارەتی پێشمەرگە و ئەمەریکا نەخشەڕێگەی چاکسازی و بەردەوامی هاوکارییە لۆجیستییەکان تاوتوێ دەکەن
لە چوارچێوەی هەوڵەکان بۆ ڕێکخستنەوەی هێزەکان و بەهێزکردنی توانای سەربازیی هەرێمی کوردستان، بەرپرسانی باڵای وەزارەتی پێشمەرگە و نووسینگەی هاریکاریی ئاسایشی ئەمەریکا کۆبوونەوە و جەختیان لە گرنگیی بەردەوامی پاڵپشتییە لۆجیستییەکان و سەرخستنی پرۆسەی چاکسازیی کردەوە.
ئەمڕۆ سێشەممە 25ـی تشرینی دووەمی 2025، لە دیوانی وەزارەتی پێشمەرگە بە سەرپەرشتی و ئامادەبوونی فەریق روکن عیسا عوزێر، سەرۆکی ئەرکانی وەزارەتی پێشمەرگە و لیوا ڕوکن بەختیار محەممەد سدیق، ئەمینداری گشتی و ژمارەیەک لە ئەفسەرانی باڵای وەزارەتەکە، کۆبوونەوەی مانگانەی هاوبەش لەگەڵ کۆڵۆنێڵ دێک پایلویک، بەرپرسی نووسینگەی هاریکاریی ئاسایش لە کونسوڵخانەی گشتیی ئەمەریکا بەڕێوە چوو.
بە پێی ڕاگەیەندراوی وەزارەتی پێشمەرگە، لەم کۆبوونەوەیەدا، گفتوگۆ لەسەر دوایین پێشهات و تازەگەرییەکانی دۆسیە ئەمنییەکان کرا و بە وردی پێداچوونەوە بە میکانیزمی گەیاندنی هاوکارییە لۆجیستییەکانی هاوپەیمانان بۆ هێزەکانی پێشمەرگە کرا تاوەکو دڵنیایی بکرێتەوە لەوەی پرۆسەکە بە باشترین شێوە خزمەت بە توانای سەربازیی هەرێم دەکات.
تەوەرێکی دیکەی کۆبوونەوەکە تەرخان کرا بۆ تاوتوێکردنی هەنگاوەکانی پرۆسەی چاکسازیی و ڕێکخستنەوەی هێزەکان و تێیدا، جەخت لە گرنگیی بەردەوامیی هەماهەنگیی نێوان تیمەکانی وەزارەت و نووسینگەی هاریکاریی ئاسایش کرایەوە بۆ سەرخستنی ئەو پلان و بەرنامانەی کە ئامانجیان بەهێزکردنی ژێرخانی سەربازیی کوردستانە.
لە کۆتایی کۆبوونەوەکەدا، بەرپرسانی باڵای وەزارەتی پێشمەرگە ستایشی ڕۆڵی کاریگەری تیمە سەربازییەکانی ئەمەریکا و ڕاوێژکارانی هاوپەیمانانیان لە پەرەپێدانی پەیوەندییەکان کرد و بەڵێنیاندا، ئاستی هەماهەنگییەکان بۆ قۆناغی داهاتوو فراوانتر بکەن و هەوڵەکان چڕتر بکەنەوە لە پێناو پاراستنی ئاسایش و سەقامگیریی ناوچەکە.
